Պատկան մարմիններից մենք չստացանք ընկալելի արձագանք․ Արման Աբովյան
ՔԱՂԱՔԱԿԱՆՈՒԹՅՈՒՆ
ԲՀԿ պատգամավոր Արման Աբովյանը ֆեյսբուքյան իր էջում գրառում էր կատարել, որով անդրադարձել էր Հայաստանում ալկոհոլային թունավորումից մահացածների քանակին և պատկան մարմինների կողմից այդ ուղղությամբ տարվող աշխատանքներին։
Այդ թեմայով 1or.am կայքի լրագրողը զրուցել է պատգամավորի հետ և փորձել է ճշտել Արման Աբովյանի տեսակետը ստեղծված խնդրի շուրջ։
«Այստեղ պատկան մարմինների շատ հանգիստ վերաբերմունքն է, այո, քրեական գործ է հարուցվել, կան արդեն կասկածյալներ, բայց սա հետևանքի հետ պայքարն է, բայց պատճառը ի՞նչն է։ Ի՞նչ համակարգ պետք է ձևավորվի, որ շուկայում չհայտնվի այդպիսի ալկոհոլ կամ մթերք։ Որովհետև, պատկերացնում եք, 17 մարդ է մահացել։ Եվ այս պարագայում, ցավոք, պատկան մարմիններից մենք չստացանք ընկալելի արձագանք, և մինչև հիմա անհասկանալի է, թե ինչպես է ընթանալու այս իրավիճակը։ Միայն պատժելով և քրեական գործեր հարուցելով այս հարցը չի լուծվի, պետք է համակարգային մոտեցում լինի այդ կարգի հարցերին։ Մենք հիմա աշխատում ենք հետևանքների դեմ, բայց մեզ պետք է ստեղծել մի համակարգ, որը ի սպառ կբացառի այսպիսի իրավիճակները։ Իսկ այս դեպքում դա պատկան մարմինների գործառույթն է»։
Իսկ այն հարցին, թե Սննդամթերքի անվտանգության տեսչությունը որքանո՞վ է պատասխանատու, որ ապրանքը իրացվել է, պատգամավորը պատասխանեց․
«Խնդիրը շատ կոմպլեքսավորված է, և ես ուսումնասիրել եմ հարցը, և՛ Սննդամիթերքի անվտանգության տեսչությունը, և՛ վերստուգիչ կազմակերպությունները պետք է ավելի ակտիվ աշխատեն։ Այս հարցին պետք է կոմպլեքսային լուծում տրվի, և պետք է առավել խստացնեն պատասխանատվությունը և վերահսկողությունը, որովհետև այստեղ մենք տեսնում ենք՝ մարդկանց կյանքերի խնդիր է կանգնած։ Գիտեք գլխի մեջ չի տեղավորվում մի քանի օրվա ընթացքում 17 մարդու մահ, և այս հարցերի լուծումը պետք է լինի համակարգված և ինչքան հնարավոր է շուտ»։
Սոնա Գիշյան
