Տնտեսագիտական նոնսենս
ՀԱՍԱՐԱԿՈՒԹՅՈՒՆ
Այն, որ Հայաստանը գտնվում է սոցիալ-տնտեսական ճգնաժամում, կրճատվել են աշխատատեղերը և նվազել մարդկանց եկամուտները` ապացուցման կարիք չունի, քանի որ կայացած փաստ է։ Սակայն, այս ակնհայտ և անգամ պաշտոնական վիճակագրության կողմից հաստատված իրողությանը Նիկոլ Փաշինյանը փորձում է հակադրվել։ Նրա ձգտումը մարդկանց խաբելու և համոզելու, որ իր կառավարման ընթացքում ամեն ինչ միայն լավանում է, հասել է մոլագարության։ Հերթական անգամ նա գրել է, թե հուլիս ամսին աշխատատեղեր են ավելացել նախորդ տարվա հուլիսի համեմատ։ Արդեն մի տեսակ բարի ավանդույթ է դարձել, որ մինչ վիճակագրական տվյալները հրապարակվելը, Նիկոլ Փաշինյանը ինչ-որ ցուցանիշներ է հրապարակում՝ դրանով արդեն ուղղորդելով վիճակագրական կոմիտեին, թե ինչ թվեր պետք է հրապարակել։ Միաժամանակ, նման քայլով նա հնարավորություն չի տալիս համադրումներ և համեմատություններ անել՝ պարզելու համար, թե որքանո՞վ են համապատասանում իր նշած տվյալները իրականությանը։Սակայն, արդեն իսկ հրապարակված ցուցանիշներով էլ հնարավոր է հերքել վերոնշյալ կեղծիքը։
Ըստ էության՝ տնտեսության մասին անգամ տարրական պատկերացում չունեցող Նիկոլը պետք է իմանար, որ անհար է երկնիշ տնտեսական անկում գրանցված ամսին աշխատատեղեր ավելանային։ Չկա և չի կարող լինել մի երկիր, որտեղ նման երեւույթ տեղի ունենա։ Հուլիս ամսին տնտեսական ակտիվության անկումը կազմել է 10,2 տոկոս նախորդ տարվա հուլիսի համեմատ։ Սա տնտեսագիտական նոնսենս է։ Ինչպե՞ս կարող է ենթադրենք, ինչ-որ ձեռնարկություն ավելի քիչ աշխատի և ավելի քիչ արտադրանք թողարկի, բայց ավելի շատ մարդկանց աշխատեցնի և ավելի բարձր աշխատավարձ վճարի նրանց։
Պարադոքսալ է նաև այն, թե տնտեսության այդ ո՞ր ճյուղում են աշխատատեղերն իբր ավելացել և աշխատավարձերը բարձրացել։ Հուլիս ամսին անցած տարվա հուլիսի համեմատ արդյունաբերությունում անկումը կազմել է 2,3 տոկոս, շինարարությունում՝ 9,5 տոկոս, առևտրում՝ 10,4 տոկոս, ծառայություններում՝ 21,6 տոկոս։ Այսքանը թերևս բավարար է պատկերացում կազմելու համար, թե որքան բացահայտ է աշխատատեղերի ավելացման Նիկոլ Փաշինյանի հերթական սուտը և որքան թաքնված ցինիզմ կա նրա կողմից այդ ստին հավատացողների նկատմամբ։
Անդրանիկ Կիրակոսյան
