Հայաստանի ֆուտբոլի ֆեդերացիան շարունակում է լռել
ՀԱՍԱՐԱԿՈՒԹՅՈՒՆ
Երկու օր է մամուլը հեղեղված է Կենտրոն վարչական շրջանում, մասնավորապես՝ Կասկադում օգոստոսի 30-ին, ժամը 23.15-ի սահմաններում մի խումբ երիտասարդների կողմից Ճանապարհային ոստիկանության աշխատակիցներին ծեծի ենթարկելու մասին տեղեկությամբ ու տեսագրություններով: Լուրը հաստատել է նաև Ոստիկանության հասարակայնության հետ կապերի և լրատվության վարչությունը, տեղեկացնելով, որ խուլիգանության դեպք է արձանագրվել, հարուցվել է քրեական գործ, տուժել է 4 ոստիկան, նշանակվել է դատաբժշկական փորձաքննություն, սակայն, պաշտոնապես չեն նշել, թե արդյոք այն Հայաստանի հավաքականի ֆուտբոլիստների և ոստիկանների միջև է տեղի ունեցել:
Հիշեցնենք, որ երկու երիտասարդ քաշքշել են ճանապարհային ոստիկանության տեսուչներին, կոպիտ կերպով խախտել են հասարակական կարգը՝ հայհոյանքներ են հնչեցրել: Ժամը 23.45-ին ոստիկանության ծառայողները, իշխանության ներկայացուցչի նկատմամբ բռնություն գործադրելու և խուլիգանություն կատարելու կասկածանքով, Կենտրոնական բաժին բերման են ենթարկել 30 և 26 տարեկան երկու երիտասարդի: Շրջանառվող տեղեկությունների համաձայն՝ բերման ենթարկվածները Հայաստանի ֆուտբոլի հավաքականի ֆուտբոլիստներ են` եղբայրներ Գոռ և Էդգար Մալաքյանները:
Երեկվանից 1or.am-ը փորձում է կապ հաստատել ՀՀ ֆուտբոլի ֆեդերացիայի մամուլի քարտուղարի հետ, սակայն ֆեդերացիայի հետ կապ հաստատելու մեր բոլոր ջանքերը մինչ այս պահը ապարդյուն են: Ֆեդերացիայի մամուլի քարտուղար Հայկ Կարապետյանը չի պատասխանում հեռախոսազանգերին: Ուշագրավ է, որ դեպքից արդեն բավական ժամանակ է անցել, սակայն այս մասին ֆեդերացիան դեռևս չի շտապում որևէ պաշտոնական մեկնաբանություն տարածել: Դրա փոխարեն հայտարարություն են տարածել Երևանի «Փյունիկ» և «Արարատ» ֆուտբոլային ակումբները. պաշտոնական հայտարարություններով մեկնաբանել են ֆուտբոլիստներ Գոռ եւ Էդգար Մալաքյանների ձերբակալությունը և նշել, որ Էդգարը հանդիսանում է «Արարատի» ֆուտբոլիստ: Միևնույն ժամանակ ակումբների տարածած հայտարարության մեջ ասվում է, որ խիստ մտահոգիչ են համարում, որ միջադեպի վերաբերյալ տրվել է թռուցիկ նկարագրություն, ինչի արդյունքում հասարակության մոտ ստեղծվել է թյուր կարծիք տեղի ունեցածի մասին:
Հույս ունենք, որ մեր այս անդրադարձից հետո ՀՖՖ-ի մեկնաբանությունը չի ուշանա, քանի որ նման աղմկահարույց իրավիճակների դեպքում լռությունը ծնում է այլ ասեկոսեներ, որը ավելի վտանգավոր է, քան կատարվածի մասին ռեալ գնահատական տալը:
Հայկ Ներսիսյան
