Է. Մարուքյանն առաջարկում է ԸՕ-ից հանել տարածքային կուսակցություններ ստեղծելու մասին դրույթը
ՔԱՂԱՔԱԿԱՆՈՒԹՅՈՒՆ
ԱԺ-ում նոր ԸՕ-ի քննարկման ժամանակ անկախ պատգամավոր Էդմոն Մարուքյանը մտահոգություն հայտնեց ԸՕ-ում տեղ գտած մի քանի կարևոր հարցերի շուրջ:
«Այստեղ բավական տարբեր կարծիքներ հնչեցին, ես կփորձեմ չկրկնվել: Կանգ կառնեմ մի քանի կարևոր կետերի վրա. Անկախ նրանից, որ մենք դեմ ենք ԸՕ այս տարբերակին, այնուամենայնիվ, կոչ ենք արել միջազգային մեր գործընկերներին աջակցել Հայաստանին էլեկտրոնային համակարգը ներդնելու հետ կապված, կոչ ենք արել նաև համապատասխան ֆինանասական աջակցությամբ հանդես գալ ու պատրաստ ենք ստորագրել նմանատիպ ցանկացած դիմումի տակ: Բայց դա չի նշանակում, որ ԸՕ-ի մնացյալ մասով մենք խնդիրներ չենք տեսնում ու կարող ենք ասել, այո´, մենք կողմ ենք նման օրենսգրքին»,- ասաց Է. Մարուքյանը` հավելելով, թե 2007 թվականից սկսած փորձում է պնդել, որ եթե ընտրատեղամասը լավ հսկողության տակ է առնվում, ապա այդտեղ ընտրախախտումները կարող են հասցվել նվազագույնի: «Խոսքը պառլամենտական ընտրությունների մասին է»,- ասաց Մարուքյանը՝ մանրամասնելով, որ պառլամենտական ընտրության ժամանակ կան բազմաթիվ շահեր, ու տվյալ պարագայում դժվար է բոլորի համաձայնությունը ստանալ մեկ գաղափարի շուրջ՝ կատարելով կեղծիք:
Մյուս խնդրահարույց հարցը, ըստ պատգամավորների, ռեգիոնալ կուսակցությունների ներդրման ինստիտուտն է. «Դուք թույլ եք տալիս՝ ռեգիոնալ կուսակցություններ ստեղծվեն միայն Վանաձորում ու Գյումրիում, այստեղ հարց է առաջանում՝ մյուս մարզերի բնակիչների հանդեպ ինչո՞ւ ենք խտրական վերաբերմունք ցուցաբերում, հնարավոր է, որ իրենք էլ են ցանկանում նման կուսակցություններ բացել: Ասվում է, որ Երևանում ևս հնարավոր է ստեղծել նման կուսակցություն: Քաղաքականությունից դուրս մնացած օլիգարխները Երևանում կարող են ստեղծել կուսակցություններ, ռեսուրս ներդնել ինչ-որ չափով, քանի որ այդտեղ 150 մարդ է հարկավոր ներդնել աշխատանքներին մասնակցելու համար, ասենք մեկն իր խանութի աշխատողներին կարող է ներգրավել իր այդ գործերում: Սա կարող է ապականել քաղաքական ամբողջ համակարգը: Ես առաջարկում եմ հանել այս կետը»,-ասաց է. Մարուքյանը:
