Դետրոյթի «մահացած» բնակիչը աչքերը բացել է թաղման բյուրոյում

ԱՄՆ Դետրոյթ քաղաքի բնակիչը, ում մահացած էին ճանաչել, աչքերը բացել է թաղման բյուրոյում, հայտնում է WXYZ-TV տեղական հեռուստաալիքը։

Կիրակի բժիշկների բրիգադը կանչ է ստացել այն բանից հետո, երբ 20-ամյա Թայմիշա Բոշամբը դադարել է կյանքի նշաններ ցույց տալ։ Շտապօգնության բժիշկները կես ժամ փորձել են աղջկան «կենդանացնել», որը, փրկրարաների խոսքով, չէր շնչում, բայց անհաջող փորձերից հետո նրան մահացած են ճանաչել։

Դրանից հետո «մահացած» աղջկա վերաբերյալ բժշկական տեղեկությունները փոխանցել են դատաբժշկական փորձագետներին, որոնք հաստատել են, որ Բոշամբը մահացած է, եւ քանի որ բռնի մահվան հետքեր չեն հայտնաբերել, «մարմինը» փոխանցել են աղջկա ընտանիքին դիահերձում անցկացնելու համար, որ իրենք ընտրեին թաղման բյուրոն։

Սակայն արդեն թաղման բյուրոյում պարզվել է, որ աղջիկն իրականում չի մահացել, նա շնչում էր։

«Նրան գրեթե բալզամապատել էին, եթե նա աչքերը չբացեր, ահա թե որն է ամենասարսափելին... Մարդկանց ամենավատթար մղձավանջերից մեկը պատկերացնելն է, որ իրենց համար շտապօգնություն են կանչում, բայց դրա փոխարեն դիակների պայուսակով թաղման բյուրո են ուղարկում։ Թաղման բյուրոն տառացիորեն հետ է քաշել դիակների պայուսակի շղթան եւ նրան տեսել ողջ բաց աչքերով, ահա թե ինչ է տեղի ունեցել Թայմիշայի հետ»,- ասել է աղջկա ընտանիքի վարձած փաստաբան Ջոֆրի Ֆիջերը։

Նրա խոսքով՝ աղջկա ապաքինվելու համար կորցրած 1,5 ժամը կարող էր անչափ վտանգավոր լինել։ Նա չի հստակեցրել, թե Բոշամբը հիմա ինչ վիճակում է՝ նշելով միայն, որ նա ողջ է եւ միացված է ԹԱՕ սարքին։