Լավրովը նշել է հայ-ադրբեջանական հուլիսյան կոնֆլիկտի պատճառները
ՔԱՂԱՔԱԿԱՆՈՒԹՅՈՒՆ
Ռուսաստանի արտգործնախարար Սերգեյ Լավրովը, ռուսական «Տրուդ» պարբերականին տված հարցազրույցում, ի թիվս այլոց, պատասխանել է լրագրողի այն հարցին, թե ինչն է կանգնած հայ-ադրբեջանական սահմանում հերթական սրացումների ետևում, և որքանով է հավանական, որ այն կվերածվի լայնամասշտաբ ռազմական հակամարտության:
Լավրովն ասել է, որ սահմանային հակամարտությունը, որը տեղի է ունեցել 2020 թվականի հուլիսի 12-16-ը, 1994 թվականի հրադադարի մասին համաձայնագրի երկրորդ ամենազանգվածային խախտումն է (2016-ի ապրիլից հետո):
ՌԴ արտգործնախարարը նշել է, որ վերջին 26 տարվա ընթացքում առաջին անգամ բախումներ են սկսվել դաշտային հրետանու, ականանետերի և հարձակողական անօդաչու սարքերի միջոցով, որոնք տեղի են ունեցել ոչ թե Ղարաբաղի շփման գծում, այլ ուղղակիորեն Հայաստանի և Ադրբեջանի միջև պետական սահմանի հատվածում:
«Պատճառների մի ամբողջ համալիր է հանգեցրել կոնֆլիկտի: Հիմքը, իհարկե, ղարաբաղյան չլուծված խնդիրն է: Բացի դրանից՝ սահմանի երկու կողմերում հասարակության բացառիկ գերտաքացումն է: Խթան է ծառայել նաև աշխարհագրական գործոնը. հայկական կողմի որոշումը՝ վերականգնել հին սահմանային անցակետը, որը գտնվում է ադրբեջանական խողովակաշարերից 15 կմ հեռավորության վրա, դա մյուս կողմի մոտ առաջացրել է ուժեղ անհանգստություն, չարդարացված պատասխան, և դրա հետևանքով սկսվել է առճակատում՝ առավել անկանխատեսելի հետևանքներով»,- ասել է Սերգեյ Լավրովը:
ՌԴ ԱԳՆ ղեկավարը խոսել է նաև այն մասին, թե ինչ գործողություններ է ձեռնարկվել իրավիճակը կայունացնելու համար:
«Ռուսաստանի արտաքին գործերի նախարարությունը դիմել է կողմերին` հրադադարը անմիջապես դադարեցնելու կոչով: Իրականացրել է հեռախոսազրույցներ Հայաստանի և Ադրբեջանի գործընկերների հետ, հանդիպումներ են եղել ադրբեջանցիներին և հայերին միավորող կազմակերպությունների ներկայացուցիչների հետ: Երկու սփյուռքները պետք է լիովին գիտակցեն իրենց պատասխանատվությունը Ռուսաստանի Դաշնության օրենքների պահպանման համար, ինչպես նաև նպաստելու են Բաքվի և Երևանի միջև հարաբերությունների կարգավորմանը նպաստող մթնոլորտի ստեղծմանը»,- ասել է ՌԴ արտգործնախարարը:
Լավրովը նաև նշել է, որ Լեռնային Ղարաբաղի հարցով ԵԱՀԿ Մինսկի խմբի ռուսաստանցի համանախագահ Պոպովն ուղիղ կապի մեջ է եղել Հայաստանի և Ադրբեջանի արտաքին գործերի նախարարությունների ղեկավարության հետ՝ նշելով, որ արդյունքում, Ռուսաստանի ակտիվ միջնորդությամբ հնարավոր է եղել հասնել, թեպետ ոչ առաջին փորձից՝ հուլիսի 16-ին հրադադարի հաստատմանը:
«Մենք հույս ունենք ղարաբաղյան հիմնախնդրի կարգավորման բանակցային գործընթացի շուտափույթ վերսկսման: Մենք դրա վրա աշխատում ենք ԵԱՀԿ Մինսկի խմբի մեր գործընկերների հետ»,- ասել է Լավրովը:
Ռուսաստանի արտգործնախարարը նաև ասել է, որ 2020 թվականի օգոստոսի դրությամբ իրավիճակը քիչ թե շատ կայունացել է, սահմանին և շփման գծում հարաբերական անդորրը պահպանվում է, և հասարակական փոխադարձ մեղադրանքները թուլացել են:
