Թոշակի անցնելն աշխարհի վերջը չէ.6 զբաղմունք նրանց համար,ովքեր «վերջապես» ազատվել են աշխատանքից
ՀԱՍԱՐԱԿՈՒԹՅՈՒՆ
Անձի զարգացման տարիքային ճգնաժամերից մեկը դիտվում է ուշ հասունացման և ծերության տարիքային շրջանում (55-65տ.): Այն պայմանավորված է, մասնավորապես՝ հասարակության մեջ մարդու սոցիալական կարգավիճակի փոփոխությամբ, այն է՝ թոշակի անցնելու հանգամանքով: Անձն իրեն անպիտան է զգում ինչպես սեփական ընտանիքի, այնպես էլ հասարակության համար:
Նշված ճգնաժամը կարելի է հաղթահարել՝ թոշակի անցնելու հանգամանքը որպես հնարավորություն օգտագործելով: Շատերն ընտանիքի բարեկեցության համար են ընտրում աշխատանքը, և գրեթե ողջ կյանքի ընթացքում անում են այն, ինչ պետք է անել, ոչ թե այն, ինչ ուզում են: Թոշակի անցնելը Ձեզ ազատում է տհաճ աշխատանքի ճիրաններից և հնարավորություն է տալիս անելու այն, ինչն իսկապես ուզում եք:
Այսպիսով, Ձեզ ենք ներկայացնում 6 հաճելի զբաղմունք, որոնք կարող են նոր գույներ հաղորդել Ձեր՝ թոշակառուի կարգավիճակին՝
1. Օտար լեզու սովորել
Երաժշտության 56-ամյա ուսուցչուհի Մերի Հոբսոնը՝ կարդալով Լև Տոլստոյի «Պատերազմ և խաղաղություն» վեպը, ցանկացել է սովորել ռուսաց լեզուն, որ լիարժեքորեն հասկանա և զգա վեպը, ինչպես նաև ծանոթանա ռուս գրողների գլուխգործոցներին: 62 տարեկանում Մերին սովորել է համալսարանի Սլավոնական բանասիրության ֆակուլտետում, իսկ 66 տարեկանում ուսումը շարունակել է ասպիրանտուրայում: Արդյունքում, ջանասեր տատիկը դարձել է պրոֆեսիոնալ թարգմանչուհի և թարգմանել է Գրիբոյեդովի ու Պուշկինի աշխատությունները՝ արժանանալով գրական մրցանակների:
2. Վարորդական իրավունքներ ստանալ
Համառության և նպատակասլացության օրինակ է ցուցաբերել նաև Հարավային Կորեայի թոշակառու տատիկ Չա Սա Սունը, ով այնքան շատ էր ուզում վարորդական իրավունքներ ստանալ, որ ավտոդպրոցում 960 անհաջող փորձերից հետո՝ մինիմալ բալ ստանալով, հասել է իր նպատակին: Պետք է նշել նաև, որ նա սկսել է մեքենա վարել 10 անհաջող փորձից հետո:
3. Նոր հմտություն ձեռք բերել
Կարող եք Ձեր ուժերը փորձել ֆոտոնկարչության, երգեցողության, զումբայի կամ այլ պարերի ու զբաղմունքների մեջ: Օրինակ՝ 68-ամյա Ռութ Ֆլաուերսը գիշերային ակումբում մասնակցելով իր թոռան ծննդյան խնջույքին՝ չցանկանկացավ բաժանվել այդ մթնոլորտից, որը լի է ուրախությամբ, լույսերով ու երաժշտության ռիթմերով: Արդյունքում, 68 տարեկանում նա դարձավ DJ Mamy Rock, և մեր օրերում Tiesto-ի և David Guetta-ի հետ ելույթ է ունենում միևնույն բեմում:
4. Ճամփորդել
60-ամյա ամերիկուհի Սանդրա Պեյնը սովորել է ինքնաթիռ վարել և 73-ամյա ամուսնու՝ Բարրիի հետ սկսել է շուրջերկրյա ճանապարհորդություն: Նրանք արդեն անցել են Ճապոնիայի, Ավստրալիայի, Կանադայի, Ֆրանսիայի, Շվեյցարիայի և այլ երկրներով, որոնք նշված են թոշակառուների երթուղային քարտեզում: Սանդրայի և Բարրիի երեխաներն ու թոռները հպարտանում են իրենց ծնողներով (տատիկով ու պապիկով):
5. Սեփական բիզնես հիմնել
58-ամյա տնային տնտեսուհի Անիտա Կրուկը՝ նկատելով սեփական կոսմետիկայի պայուսակի անհարմարությունը. այնտեղ անհնար էր տեղավորել բոլոր անհրաժեշտ իրերը: Անիտան որոշել է կոսմետիկայի պայուսակների բիզնես սկսել՝ պատրաստելով բազմաթիվ գրպաններով պայուսակներ: Նրա պայուսակները մեծ արագությամբ սպառվեցին, ինչից հետո երիտասարդ տատիկը զանգվածային արտադրանք է ապահովել՝ 2 մլն դոլարին համարժեք եկամուտ ստանալով:
6. Կահույքագործությամբ զբաղվել
Ամերիկացի Բիլլ Բրաունը թոշակի անցնելուն վաղուց էր պատրաստվել, քանի որ սարսափում էր սպասվող ձանձրույթից: Թոշակի անցնելուն պես՝ նա սեփական ավտոտնակում սկսեց զբաղվել կահույքագործությամբ: Սկզբում նա կահույք էր պատրաստում իր ընտանիքի, այնուհետև՝ հարևանների համար: Այժմ նա դրանք վաճառում է նաև համացանցով և ստանում է մեծ գումարներ:
Նյութհ հրապարակման պատրաստեց Լիլիթ Ամիրաղյանը:
