Հայաստանում արտակարգ դրությունը երկարաձգվելու է ևս մեկ ամսով.Օրվա լրահոսը մեկ տողով 6.08.20
ՀԱՍԱՐԱԿՈՒԹՅՈՒՆԲեյրութում տեղի ունեցած պայթյունի հանգամանքների նախնական ուսումնասիրությունը ցույց է տվել, որ կատարվածի պատճառը կարող էր լինել նավահանգստի տարածքում պայթուցիկ նյութերի պահման հարցում ցուցաբերված անփութությունը: Խնդրով զբաղվող տեսչությունը խախտումներին ուշադրություն է դարձրել դեռևս վեց ամիս առաջ, սակայն ոչինչ չի արվել պայթյունավտանգ նյութը տեղափոխելու համար: Նավահանգստի ղեկավարը տեղի լրատվամիջոցներից մեկին հայտնել է, որ պահեստում այդ նյութը պահվել է դատարանի որոշմամբ: Նա հավելել է, որ իրենք տեղյակ են եղել, որ այն վտանգավոր է, սակայն չեն պատկերացրել, որ «այս աստիճանի»:
Լիբանանի մայրաքաղաքի քաղաքագլուխ Մարվան Աբուդը հայտարարել է, որ 300 հազար քաղաքաբնակներ մնացել են առանց տանիքի, իսկ պայթյունից վնասը գնահատվում Է 3-ից 5 մլրդ դոլար: Պայթյունի ուժն այնքան ուժգին է եղել, որ ալիքն զգացել են նույնիսկ Կիպրոսում, որը գտնվում Է Լիբանանի մայրաքաղաքից ավելի քան 200 կիլոմետր հեռավորությամբ:
ՀՀ կառավարությունը՝ Արտաքին գործերի նախարարության և Սփյուռքի գործերի գլխավոր հանձնակատարի գրասենյակի միջոցով մշտական կապի մեջ է Լիբանանի կառավարության և համայնքային կառույցների ղեկավարների հետ՝ մեր երկրից եղբայրական Լիբանանին օգնություն ցուցաբերելու նպատակով: ՀՀ կառավարությունը թիրախային օգնություն կհասցնի Բեյրութ՝ ինչպես կառավարական, այնպես էլ համայնքային մակարդակով: Օժանդակությունը կլինի դեղորայքի, բժշկական սարքավորումների, սննդի և այլ պարագաների տեսքով: ՀՀ կառավարության օգնությունը տեղ կհասնի հնարավորինս արագ՝ հատուկ չվերթով, նշել է վարչապետի խոսնակ Մանե Գևորգյանը:
Լիդիանի պանորդական խմբի կողմից իրականացված գործողությունների արդյունքում իրավիճակը կրկին սրվել է: Ամուլսարի պահապաններն իրենց ընտանիքներով երկու օր է փակել են դեպի սար տանող ճանապարհը և գիշեր-ցերեկ այնտեղ ից չեն հեռանում: Ոստիկանները ցանկանում են բացել փակ ճանապարհը։ Կան բերման ենթարկված քաղաքացիներ։ Վայոց ձորի ոստիկանապետ Գևորգ Ազիզյանը, սակայն հայտնել է, որ տեղեկություն չունի, թե քանի հոգի են բերման ենթարկվել։
Երեկ Քրեական ոստիկանության գլխավոր վարչության ծառայողները «M Group» ընկերությունում լայնածավալ գործողություններ են իրականացրել: Ընկերության փաստաբան Ամրամ Մակինյանի խոսքով՝ իրեն թույլ չեն տվել մուտք գործել տարածք, իրավաբանական օգնություն ցույց տալ և պաշտպանել ընկերության շահերը: «Ոստիկաններին ցուցում է տրվել՝ անել ամեն ինչ, ասվել է՝ դուք խնդիր չունեք: Իմ գիտակցական կյանքում այսպիսի քննչական գործողության ականատես չեմ եղել»,- շեշտել է փաստաբանը։
Հայաստանում արտակարգ դրությունը, որի ժամկետը լրանալու էր օգոստոսի 12-ին, երկարաձգվելու է ևս մեկ ամսով: Այն ամենայն հավանականությամբ կլինի վերջին երկարաձգումը։ Այդ մասին երեկ պարետատան նիստից հետո տեղի ունեցած ճեպազրույցի ժամանակ ասել է պարետ Տիգրան Ավինյանը։ Նա նաև տեղեկացրել է, որ նախատեսվում է մի շարք արգելքներ մեղմացնել։ Մասնավորապես՝ վերանայվելու է օտարերկրյա քաղաքացիների մուտքի հարցը, ապրանքների արտահանման սահմանափակումները, հանրահավաքներ անցկացնելու, հանրային միջոցառումների անցկացման հարցը,- նշել է նա:
Նոր կորոնավիրուսային համավարակով պայմանավորված, ՀՀ զինված ուժերում հնարավոր բարդություններից խուսափելու համար, շարունակում են իրականացվել կանխարգելիչ և հակահամաճարակային միջոցառումներ: Պաշտպանության նախարարությունից ծնողներին տեղեկացնում են նաև, որ նորակոչիկների զինվորական երդման արարողություններն իրականացվելու են զորամասերի մշտական տեղակայման վայրերում, բացառվելու են բոլոր տեսակի հրավերները, տեսակցություններն ու ընդունելությունները։ Պաշտպանության նախարարությունը խնդրում է ըմբռնումով մոտենալ ժամանակավոր սահմանափակումներին, որոնք կիրառվում են զինծառայողների առողջության պահպանման և զինված ուժերի բնականոն կենսագործունեության պատշաճ իրականացման նպատակով։
