Երևան տեղափոխված 13–ամյա աղջկան արհեստական շնչառության սարք է միացվել
ՀԱՍԱՐԱԿՈՒԹՅՈՒՆԵրեխայի վիճակը պետք է գնահատել ծայրահեղ ծանր, սակայն այս պահին զարկերակային ճնշումն ու սրտի աշխատանքը նորմայի սահմաններում են։ Այս մասին այսօր՝ մարտի 6–ին, լրագրողների հետ զրույցում ասաց «Սուրբ Աստվածամայր» բժշկական կենտրոնի վերակենդանացման բաժանմունքի վարիչ Աննա Չոբանյանը՝ անդրադառնալով երեկ Գյումիրիում ծեծի ենթարկված 13–ամյա աղջկա առողջական վիճակին, որին գիշերը տեղափոխել են Երեւան։
Նրա խոսքով՝ թե ինչ զարգացում կլինի, այս պահին պարզ չէ. «Մենք ինֆորմացիան ընթացքում կտանք։ Պետք է ասել, որ Գյումրիում առաջին օգնությունը ցուցաբերելուց հետո՝ տեղափոխման ժամանակ, երեխան միտում է ունեցել ցածր ճնշման, որը շտկվել է ճանապարհին, եւ հիմա զարկերակային ճնշումն ու սրտի աշխատանքը նորմայի սահմաններում են, բայց շնչառությունը պահպանվում է արհեստական շնչառության սարքով»։
Ավելի վաղ NEWS.am-ը հայտնել էր, որ Գյումրիում մարտի 5–ին ողբերգական դեպք է տեղի ունեցել. ոստիկանները հայտնաբերել են 43-ամյա կնոջ դին եւ իր 13-ամյա դստերը՝ ծայրահեղ ծանր վիճակում. հանցագործությունը կատարելու կասկածանքով բերման է ենթարկվել 28-ամյա երիտասարդ։ Հայտնաբերվել եւ հանցագործություն կատարելու կասկածանքով բերման է ենթարկվել 28-ամյա մի տղամարդ, որը, ըստ մամուլի տեղեկությունների, մահացած կնոջ ընկերն է եղել և, նախնական տեղեկություններով, ծեծի է ենթարկել մորն ու դստերը։
