«Փաստ». Ինչո՞ւ ընդունեցին ԼՀԿ-ի նախագիծը, հետո մերժեցին
ՄԱՄՈՒԼԻ ՏԵՍՈՒԹՅՈՒՆ«Փաստ» թերթը գրում է. «Ինչպես հայտնի է, երկուշաբթի օրը ԱԺ պետաիրավական հարցերի մշտական հանձնաժողովը բացասական եզրակացություն է տվել ԱԱԾ տնօրենի եւ ոստիկանապետի պաշտոնները քաղաքական դարձնելու վերաբերյալ օրինագծին, իսկ արդեն երեկ ԱԺ քառօրյայի մեկնարկին բացասական եզրակացություն ստացած օրինագծի վերաբերյալ իրենց բացասական դիրքորոշումը վերահաստատեցին իշխանական պատգամավորները:
Ի դեպ՝ սա այն դեպքում, երբ նախագիծն առաջին ընթերցմամբ ընդունվել էր խորհրդարանի կողմից։
«Փաստ» թերթի տեղեկություններով, այս թեմայի վերաբերյալ իշխանության ներսում լուրջ «բազարներ» են ընթացել, մասնավորապես, տեղեկությունների համաձայն՝ իրականում Նիկոլ Փաշինյանին խորքային ու ամբողջական չի ներկայացվել, թե ինչ հնարավոր ռիսկեր է պարունակում այս պաշտոնները քաղաքական դարձնելը։
Խորհրդարանում այս օրինագծի քննարկման ժամանակ պետաիրավական հարցերի հանձնաժողովի նախագահ Վլադիմիր Վարդանյանը նշել է, որ «իրավիճակը ոստիկանության ու ԱԱԾ համակարգերում կխաթարվեր, եթե նշված պաշտոնների նշանակման չափորոշիչները փոխվեին, իսկ նրանց տեղակալների նշանակման հարցում փոփոխություններ չլինեին»։
Ըստ տեղեկությունների, նախնական փուլում Փաշինյանն իր «աչքի տակ» հիշյալ պաշտոններում նշանակելու համար համապատասխան թեկնածուներ է ունեցել, սակայն ոլորտի պատասխանատվությունն ու առաջնայնությունը խորքային ուսումնասիրելուց եւ համապատասխան փորձագիտական շրջանակների հետ խորհրդակցություններ անցկացնելուց հետո նա մտադրությունը փոխել է։
Թերթի հետ զրույցում քաղաքական դաշտում ակտիվ դերակատարություն ունեցող անձանցից մեկն ասել է, որ խնդրի հետ կապված այստեղ առանցքային նշանակություն է ունեցել այն փաստը, որ նախագծով նախատեսված է եղել տվյալ ոլորտները ԱԺ-ին հաշվետու դարձնելու փաստը»:
Առավել մանրամասն՝ թերթի այսօրվա համարում
