Աննախադեպ խոշոր չափի գողություն Շիրակի մարզում. Արթիկում հափշտակել են 25 հազ. դոլարի «Արարատ» կոնյակ
ՀԱՍԱՐԱԿՈՒԹՅՈՒՆSHAMSHYAN.com-ի տեղեկություններով, ոստիկանության Արթիկի բաժնի հետաքննչական բաժանմունքում նյութեր են նախապատրաստվում անձնական ունեցվածքի գողություն կատարելու փաստով:
Ինչպես հայտնում է ֆոտոլրագրող Գագիկ Շամշյանը, երեկ՝ հուլիսի 27-ին, Արթիկի ոստիկանություն է դիմել Երևանի բնակիչ, 34-ամյա Հայկ Ք.-ն և հայտնել, որ հուլիսի 17-ի ժամը 13:00-ից մինչև հուլիսի 27-ի ժամը 14:00-ն ընկած ժամանակահատվածում, անհայտ անձը կամ անձինք, տեխնիկական միջոցների գործադրմամբ իրեն պատկանող՝ Արթիկ քաղաքի Գրիգոր Լուսավորիչի փողոցի թիվ 7 տան հարակից նկուղի երկաթյա դուռը կոտրելու միջոցով այնտեղից գողացել են 800 շիշ՝ 0,5 լիտր տարողությամբ, 3 աստղանի «Արարատ» կոնյակներ: Գ. Շամշյանի տեղեկություններով, Հայկ Ք.-ն ոստիկաններին հայտնել է, որ գողության հետևանքով իրեն պատճառվել է 12 մլն դրամի (25 հազ. դոլար) նյութական վնաս:
Արթիկի ոստիկանները՝ բաժնի պետ Միրո Մխիթարյանի, բաժնի պետի տեղակալ Սուքիաս Գրիգորյանի գլխավորությամբ, ձեռնարկում են անհրաժեշտ օպերատիվ-հետախուզական միջոցառումներ՝ հանցագործությունը բացահայտելու, կատարողին կամ կատարողներին և գողոնը հայտնաբերելու ուղղությամբ:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
