Առնվազն երկու կամ երեք պատգամավոր «Իմ քայլ»-ից դուրս է թռչելու. քաղտեխնոլոգ

Եթե նախորդ իշխանություններին քրեաօլիգարխիկ համակարգն էր իշխում, այժմ անձնիշխան համակարգն է իշխում: NEWS.am-ի հետ զրույցում նման կարծիք հայտնեց քաղտեխնոլոգ Արմեն Բադալյանն` անդրադառնալով կառավարման համակարգի հետհեղափոխական զարգացումներին։ 
«Անցած տարվա ապրիլ-մայիսյան իրադարձություններից առաջ երկրում քրեաօլիգարխիկ համակարգն էր իշխում, քրեաօլիգարխիան ստեղծել էր մի համակարգ, որն ամբողջովին սպասարկում էր իր շահերը՝ Ազգային ժողով, Կառավարություն, ուժային կառույցներ, դատական ինստիտուտ եւ այլն: Իսկ հիմա ստեղծվում է անձնիշխան համակարգ, որը սպասարկում է մեկ անձի շահերը, գործադիր իշխանությունը, Ազգային ժողովը, ուժային կառույցներն արդեն ամբողջովին այդ համակարգի մասն են կազմում, եւ մնացել է դատական համակարգը մասնակի, Սահմանադրական դատարանը եւ Արցախի ղեկավարությունը, որոնք դեռեւս այդ համակարգի մաս չեն կազմում: Այսինքն՝ նախկինում գործող քրեօլիգարխիկ եւ հիմա գործող անձապաշտական համակարգերը բովանդակությամբ տարբեր, բայց ըստ էության նույն համակարգերն են եւ բոլոր բացասական երեւույթները, որոնք այն ժամանակ կար, հիմա տեղափոխվել է այս համակարգի մեջ»,- ասաց նա: 
Բադալյանի կարծիքով` ինչպես նախկինում ՀՀԿ-ն, այնպես էլ հիմա «Իմ քայլը» դաշինքը եւ ՔՊ-ն մեկ անձի շահերն են սպասարկում. «Ինչպես այն ժամանակ կային համակարգային խմբեր, հիմա էլ այդ խմբերը ձեւավորվում են, եւ այդ խմբերի 2 բախում արդեն տեսել ենք: Մեկը դիալիզի նյութերի հետ կապված առողջապահության նախարարի եւ ՊՎԾ ղեկավարի միջեւ, մյուսը Աբովյանի քաղաքապետի ընտրություններում՝ մարզպետի եւ պատգամավորի միջեւ: Դրանք դեռեւս խմբեր չեն, դեռեւս խմբակներ են, որոնք կամաց-կամաց պետք է դառնան խմբեր»: 
Քաղտեխնոլոգի կարծիքով` ձեւավորվում է զարգացման չտանող համակարգ: 
«Հիմա ՔՊ-ում նույն երեւույթներն են, ինչ հանրապետականում էին` 1998-99, 2000 թվականներին, որոշակի մաղումներ կգնան: Կարծում էին, որ Սասուն Միքայելյանը մանդատը վայր կդնի, բայց նա մանդատը վայր չդրեց: Առնվազն երկու կամ երեք պատգամավոր «Իմ քայլ»-ից դուրս է թռչելու, այսինքն` նույն գործընթացն է, ինչ-որ նախկինում: Հիմա կուսակցությունում գնում է պայքար, թե ով է ասող լինելու, եթե հիշենք Կոտայքի մարզպետի եւ Սասուն Միքայելյանի վեճը, Սասուն Միքայելյանը ասում էր, որ մարզպետն ուզում է մարզում ասող լինի, եւ ով է ավելի մոտ լինելու իշխանությանը․ մոտավորապես այդ կռիվն է գնում»,- ասաց նա` միաժանակ ընդգծելով, որ կուսակցությունում ոչ թե պառակտման, այլ ինքնամաքրման գործընթաց է: