Բջջային խաղերի օգնությամբ կարելի է ախտորոշել աուտիզմը

Սենսորային էկրաններով սարքերի վրա խաղերի օգնությամբ կարելի է երեխաների մոտ ախտորոշել աուտիկ սպեկտրի խանգարումները: Այս մասին հայտնել են University of Strathclyde համալսարանի գիտնականները՝ Ջոնաթան Դելաֆիլդ Բաթթի ղեկավարությամբ, որը մասնագիտանում է երեխաների զարգացման հարցերով:

Harimata սթարթափի հետ (զարգացման խանգարումների վաղ ախտորոշման համար բջջային հավելվածների մշակումով զբաղվող ընկերություն) համատեղ անցկացված հետաքրքիր հետազոտության շրջանակում 3-6 տարեկան 37 երեխաների տվել են պլանշետային համակարգիչներ՝ սենսորային էկրաններով ու շարժման ներկառուցված հաղորդիչներով, որոնք գրանցում էին, թե ինչպես են երեխաների ձեռքերը շարժվում խաղի ընթացքում:

Ստացված տվյալների վերլուծությունը ցույց է տվել, որ այն պատանի մասնակիցները, որոնց մոտ աուտիզմ էր ախտորոշված, ավելի մեծ ամպլիդուտով էին շարժում ձեռքերը ու ավելի շատ ուժ էին կիրառում ու ընդհանոր առմամբ ավելի արագ ու ինտենսիվ էին շարժում մատները, քան նրանք, ում մոտ աուտիկ հատկանիշներ չեն նկատվում: Աուտիկ երեխաների խաղի ընդհանուր պատկերը զգալիորեն տարբերվում էր առողջ երեխաների խաղից:

Ստացված տվյալների հիման վրա գիտնականները մշակում են հատուկ հավելված, որը կդառնա երեխաների համար արագ, էժան ու հետաքրքիր թեստ, որի օգնությամբ հնարավոր կլինի պարզել աուտիկ սպեկտրի խանգարումը: Բժիշկ Դելաֆիլդ Բաթթը նկատել է, որ այդ հավելվածը կարող է մեծ առաջընթաց ապահովել աուտիզմի ախտորոշման հարցում, քանի որ սթրեսային չէ երեխաների համար ու չի պահանջում կլինիկա այցելել: Գիտնականները շեշտել են, որ աուտիզմի վաղ ախտորոշումը շատ կարեւոր է,քանի որ որքան շուտ այն ախտորոշվի, այդքան հեշտ կլինի կոմպենսացնել:

Հետազոտողները հայտնել են, որ աշխատանքը դեռ ավարտված չէ, դեռ պետք է ստուգել արդյոք որեւէ սահմանափակում կա այդ նոր մոտեցման կիրառման հարցում: Սակայն այդ հետազոտությունն անկասկած կարելի է անվանել առաջին քայլը դեպի խանգարման որակյալ ախտորոշում:

Նյութի աղբյուրը` NEWS.am Medicine