Սպորտի նախարարը՝ Արթուր Ալեքսանյանի մարզադպրոցի եւ բռնցքամարտի ֆեդերացիայի ֆինանսավորումը կասեցնելու մասին
ՍՊՈՐՏՀայաստանի սպորտի եւ երիտասարդության հարցերի նախարարի պարտականությունները կատարող Գաբրիել Ղազարյանը մայիսի 7-ին հանդիպեց լրագրողների հետ:
Նախարարը խոսեց կատարված աշխատանքների, ծրագրերի ու սպասվող իրադարձությունների մասին: Նա հայտնեց, որ այս տարի Հայաստանում անցկացվելու է սպորտային պարերի մինչեւ 21 տարեկանների աշխարհի առաջնություն, ինչպես նաեւ օգոստոսին տեղի կունենա խճուղային հեծանվավազքի «Տուր դը Արմենիա» միջազգային մրցաշարը, որին կմասնակցեն 100-ից ավելի հեծանվորդներ:
Գաբրիել Ղազարյանի խոսքով, հունահռոմեական ըմբշամարտի Օլիմպիական խաղերի, աշխարհի ու Եվրոպայի չեմպիոն Արթուր Ալեքսանյանի անվան մարզադպրոցը կվերանորոգվի, ինչպես նաեւ կկառուցվի նոր մարզադպրոց:
«Արթուր Ալեքսանյանի մարզադպորցի վերաբերյալ բանակցել ենք Քաղաքաշինության կոմիտեի հետ: Նախահաշվարկային բոլոր աշխատանքները կատարված են: Կկառուցվի նոր մարզադպրոց, իսկ հինը կվերանորոգվի: Շինարարական աշխատանքները կմեկնարկեն հաջորդ տարվա սկզբնամասում: Նոր մարզադպրոց կառուցելու համար կպահանջվի մոտ 480 միլիոն: Տարածքն արդեն հաստատված է քաղաքապետարանի կողմից»,- ասաց նախարարի պաշտոնակատարը:
Խոսելով Հայաստանի բռնցքամարտի ֆեդերացիայի ֆինանսավորման կասեցման վերաբերյալ՝ նախարարը նշեց, որ բռնցքամարտի ֆեդերացիային այժմ ֆինանսավորում է Հայաստանի ազգային օլիմպիական կոմիտեն:
«Սա դարձել է ամենաքննարկվող թեմաներից մեկը: Բռնցքամարտի ֆեդերացիայի ֆինանսավորումը կասեցվել է այն բանի հիման վրա, որ Օլիմպիական կոմիտեն կասեցրել է ֆեդերացիայի անդամակցությունը: Հրամանում նշված է, որ պետական աջակցություն ստացած ազգային ֆեդերացիան պարտավոր է անդամակցել Օլիմպիական կոմիտեին: Մենք շարժվում ենք օրենքով: Եթե մենք այսօր տրամադրենք այդ գումարը, կստացվի, որ խախտում ենք օրենքը: Պարոն Գեւորգյանի հայտարարությանն այն մասին, որ բռնցքամարտի ֆեդերացիայի ֆինանսավորումը շարունակվում է, իրականությանը չի համապատասխանում: Դատական գործընթացի վերաբերյալ որոշումը կհրապարակվի առաջիկա օրերին: Նախարարության կողմից ֆեդերացիայի ֆինանսավորումը դադարեցված է:
ՀԱՕԿ-ը պատրաստակամություն է հայտնել այդ գումարը տրամադրել բռնցքամարտին: Դեռ չեմ կարող ասել, թե նախարարության կողմից խնայված գումարներն ինչ նպատակների են ծառայելու»,- նշեց Ղազարյանը:
Նախարարը խոսեց նաեւ Ռաֆայել Վահանյանի շախմատի դպրոցի տնօրենի մրցույթի վերաբերյալ ստեղծված կոնֆլիկտի մասին: Ավելի վաղ հայ գրոսմայստերները բաց նամակով դիմել էին Հայաստանի վարչապետ Նիկոլ Փաշինյանին՝ խնդրելով լուծում տալ այդ խնդրին:
«Նրա տարիքը թույլ չի տալիս մասնակցել ընտրություններին: Պետք չէ մոռանալ, որ մեր փորձառու մասնագետներն ունեն գիտելինքեր եւ փորձ, ինչը պետք է օգտագործել: Մենք պարտավոր ենք օգտագործել նրանց ներուժը: Օրինակ՝ նա կարող են լինել խորհդի նախագահ կամ զբաղեցնել այլ պաշտոն»,- նշեց նախարարի պաշտոնակատարը:
