Արամ Հակոբյանի խափանման միջոցը՝ կրկին կալանավորում, Միայնակ Գայլինը՝ դեռեւս անհայտ

Այսօր Վերաքննիչ քրեական դատարանը մերժել է «Սասնա ծռեր» խմբի անդամ Արամ Հակոբյանի պաշտպանի ներկայացրած միջնորդությունը՝ խափանման միջոցը՝ կալանքը, փոխելու որոշման առնչությամբ:

Այս մասին Armtimes.com-ի հետ զրույցում տեղեկացրեց Հակոբյանի պաշտպան Տիգրան Եգորյանը:

Մեր հարցին, ի՞նչ հիմնավորմամբ է դատարանը մերժել միջնորդությունը, պաշտպանը նկատեց.

«Նույն շաբլոն պատճառաբանությամբ երեւի, ուրիշ ի՞նչ եք սպասում»,- ասաց Եգորյանը՝ նկատելով, որ չի կարող ասել, թե որոշման մեջ այն ինչպես է հիմնավորվել իրավաբանորեն, քանի որ դեռ չի կարդացել որոշումը.

«Սակայն, առանց կասկածելու կարող եմ ասել, որ հաստատ նույն շաբլոն ձեւակերպումն է»,- ասաց նա:

Հետաքրքրվեցինք,թե ո՞րն է լինելու հաջորդ քայլը, ինչին պաշտպանը պատասխանեց, որ դիմելու են Վճռաբեկ դատարան: Դատական նիստին ներկա է եղել նաեւ Արամ Հակոբյանը:

Հարցին՝ դատական նիստին որեւէ հետաքրքիր դրվագ չի՞ գրանցվել, Եգորյանը նկատեց, որ երեւի թե միակ հետաքրքիր դրվագն այն էր, որ որոշումը կայացվելու համար պահանջվել է մոտ 5 ժամ.

«Մենք հույս ունեինք, որ դա նշանակում է կա հնարավորություն առնվազն գրավով փոխարինելու կալանքը, բայց ոնց հասկանում եմ, այդ քննարկումներն արդյունք չտվեցին»,- ասաց նա:

Այսօր պետք է հրապարակվի նաեւ Վերաքննիչ քրեական դատարանի կայացրած որոշումը՝ «Սասնա ծռեր»-ի մեկ այլ անդամ՝ Արայիկ Խանդոյանի (Միայնակ Գայլ) պաշտպանի ներկայացրած միջնորդության առնչությամբ:

Խանդոյանի պաշտպան Արայիկ Պապիկյանը մեզ հետ զրույցում նկատեց, որ ամենայն հավանականությամբ առաջիկա ժամերին արդեն կհրապարակվի այն՝ նկատելով, որ Խանդոյանը պահանջել է, որ ներկա գտնվի դատական նիստին.

«Ինքը պահանջեց, դատարանն էլ ասեց՝ կապահովենք, հուսով եմ, որ կկատարեն իրենց խոսքը: Այս պահին սպասում ենք, որ ժամն ասեն, որ մոտենանք դատարանին»,- ասաց Պապիկյանը:

Հիշեցնենք, որ «Սասնա ծռեր»-ի բոլոր անդամներին առաջադրվել է նույն մեղադրանքը՝ ՀՀ Քր.օր.-ի 218 հոդվածի 3-րդ մասի 1-ին կետով (պատանդ վերցնելը) եւ 235 հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել):