Լեգենդար Վիեննայի տղաների երգչախումբը կժամանի Երևան
ՀԱՍԱՐԱԿՈՒԹՅՈՒՆ«Երևանյան Հեռանկարներ» միջազգային երաժշտական փառատոնի շրջանակներում հոկտեմբերի 4-ին Երևանում ելույթ կունենա հռչակավոր Վիեննայի տղաների երգչախումբը: Ինչպես հաղորդում է «Արմենպրես»-ը, այն ստեղծվել է 1498թ. Մաքսիմիլիանոս Առաջին կայսեր հրամանով: Դրանով իսկ կանոնակարգվեց դեռևս 1296թ-ից Կայսերական եկեղեցում երգող տղաների ավանդույթը: Երգչախմբի կազմում են եղել , ու նաև աշխատել այնպիսի հանճարներ ինչպիսիք Մոցարտը, Սալիերին, Գլյուկը, Բրուքները, Հայդն եղբայրները, Շուբերտը, Բեթհովենը և Բախը: Մինչ 1918թ.-ը երգչախումբը երգել է միայն Կայսերական պալատի համար, միայն 1920թ.-ից էր, որ այն վերածվեց առանձին կազմակերպության և սկսեց հանդես գալ լայն հասարակության համար և շրջագայել աշխարհով մեկ: Երգչախմբի ձայնագրությունները ներկայացնում է բացառապես “Դոյչե Գրամոֆոն” ընկերությունը: Վիեննայի տղաների մասին նկարահանվել է շուրջ 50 գեղարվեստական և վավերագրական ֆիլմեր, այդ թվում նաև` “Ուոլթ Դիսնեյ” ընկերության կողմից: Երգչախումբը հաճախակիորեն իր ներկայությամբ և անզուգական կատարումով զարդարում է հռչակավոր ամանօրյա համերգը, որը հեռարձակվում է աշխարհով մեկ Վիեննայի Մուզիքֆերայնի ոսկե դահլիճից:
Ավստրիայի պետությունը Վիեննայի տղաների երգչախմբին նվիրաբերել է քաղաքում գտնվող ամենագեղեցիկ պալատներից մեկը` Աուգարտենը, ուր երեխաները ապրում և հաճախում են դպրոց: Երգչախմբի անդամների տարիքը 9-14 տարեկան է: Տղաների երգչախմբի համար 2012թ.-ին Վիեննայում կառուցվեց 400-տեղանոց համերգային դահլիճ: Երգչախումբը հայտնի է նաև իր մարդասիրական ծրագրերով, բացառիկ լուսավորչական աշխատանքով, որ նրանք կատարում են փախստականների և բոլոր կարիքավորների համար, և ընդհանրապես` աշխարհի մարդկությանը առավել բարի դարձնելու նպատակով:
Համերգի ծրագրում կհնչեն.
Գալուս, Հենդել, Հայդն, Մենդելսոն, Շուբերտ, Մոխնիկ, Շեչինսկի, Կոմիտաս, Յոզեֆ Շտրաուս, Յոհան Շտրաուս, Բիլի Ջոյել, ժողովրդական երգեր, հատվածներ հայտնի Մյուզիքլներից:
