«Ըստ որոշ լուրերի, աղբի վերամշակման ստվերային գործարան կա, որի մուտքը 5000 դրամ է». «Փաստ»
ՔԱՂԱՔԱԿԱՆՈՒԹՅՈՒՆ
«Փաստ» օրաթերթը գրում է.
Մինչև քարոզարշավի մեկնարկը, մոտ մեկ ամիս ԲՀԿ ավագանու թեկնածուները շրջել են մայրաքաղաքում: Բացի այդ, շփվել են նաև երևանցիների հետ, գույքագրել և վերլուծել են այն բոլոր խնդիրները, որոնք կուտակված են Երևանում:
«Փաստ» օրաթերթի թղթակցի հետ զրույցում «Ուրվագիծ» հաղորդաշարի հեղինակ և վարող, Երևանի ավագանու ԲՀԿ ցուցակի երկրորդ համար Պետրոս Ղազարյանը նշեց, որ խնդիրները, որոնք կան Երևանում, բավականին ինքնատիպ են: Ու եթե օրինակ Նուբարաշենի առաջնային ու հիմնական խնդիրը աղբի, երկրորդային փողոցների ու ջրահեռացման հարցերն են, ապա Աջափնյակ համայնքում շենքերի 40 %–ը վթարային է:
«Մենք համայնք առ համայնք գույքագրել ենք այն խնդիրները, որոնք առկա են: Շեշտը երկու ձևով ենք դրել: Նախ, ունիկալ խնդիրներ և խնդիրներ, որոնք համայնքային են: Եվ տպավորությունն այնպիսին է, որ մարդիկ դատապարտված են այս կամ այն խնդիրն իրենց ուսերին տարիներով տանել: Օրինակ, Նուբարաշենում մարդիկ դատապարտված են աղբի հոտը շնչել, և այդ հոտը շնչելով սերունդներ են մեծանում: Այս հարցը լուծելու համար կառավարության ծրագիր կար, վարկ են վերցրել, բայց ... Եվ գիտե՞ք ինչու, որովհետև, որոշ լուրերի համաձայն, իրականում աղբահանության ստվերային գործարան կա և լավ էլ գործում է: Ըստ որոշ լուրերի, այդ աղբանոցի մուտքը 5000 դրամ է: Աբսուրդ է, քանի որ ողջ աշխարհում աղբն օգտագործվում է տնտեսության զարգացման, աշխատատեղեր ստեղծելու և դրանից վառելիք ստանալու համար, իսկ մեզ մոտ այն դարձել է պատուհաս»,– ասաց Պ. Ղազարյանը:
Նրա դիտարկմամբ, Երևանի նախկին քաղաքապետ Տարոն Մարգարյանի՝ հրաժարականի մասին հայտարարության օրից մինչ օրս «Սանիթեքը» Երևանում աղբ չի հավաքում: Եվ դա չի կարող պատահականություն կամ զուգադիպություն լինել, համոզված է հայտնի մեկնաբանը: Ինչուների պատասխանը նա այս պահին չգիտի, քանի որ դրա համար նախ հարկավոր է քաղաքապետարանի ներսից պարզել, թե ինչով է պայմանավորված նման «զուգադիպությունը»:
«Դա միայն քաղաքապետարան մտնելուց հետո հնարավոր կլինի պարզել: Դա չի կարող պատահականություն լինել: Համաձայն չե՞ք, որ չի կարող «Սանիթեքի» վատ աշխատանքը համընկնել Տարոն Մարգարյանի հրաժարականի հետ: Եվ հիմա ես ինչ վարկած էլ առաջ քաշեմ, դա կլինի օդի մեջ խոսակցություն, այդ պատճառով էլ ես չեմ ուզում հիմա գնահատական տալ այդ ամենին: Բայց որ այդտեղ համընկնում կա, ակնհայտ է: Եվ ինչ–որ մեկը պե՞տք է պատասխան տա դրա համար, թե՞ ոչ»,– ասաց Պ. Ղազարյանը:
Նրա խոսքով, եթե ԲՀԿ–ի թեկնածուն քաղաքապետ դառնա, մի քանի խնդիրների՝ աղբի, վերելակների, տրանսպորտի և սոցիալական բնակարանաշինության լուծումները միանգամից են տրվելու:
Ավագանու թեկնածուի խոսքով, ԲՀԿ–ի ընտրվելու դեպքում մայրաքաղաքի խայտառակ վիճակում գտնվող տրասպորտին կփոխարինեն էլեկտրաավտոբուսներ: Այդպիսով կլուծվի նաև էկոլոգիական հարցը:
«Երևանի օդի աղտոտվածության և փոշու մակարդակը 1,9 անգամ գերազանցում է միջազգային ամենավատ ցուցանիշը: Դրա պատճառն այն է, որ նախկին կանաչապատ թմբերի տարածքների փոխարեն, որոնք կլանում էին աղմուկն ու գազը, հիմա տնկվում են ծաղիկներ, որոնք առաջին հայացքից աչք են շոյում, բայց էկոլոգիապես որևէ օգուտ չեն տալիս: Գազի կլանում չկա, թունավոր նյութերն արտանետվում են մթնոլորտ, աղմուկն ահավոր է դարձել, իսկ եթե հաշվենք, թե ամեն տարի ինչքան գումար են ծախսում այդ միամյա ծաղիկների սերմերը գնելու, աճեցնելու վրա, բավականին հետաքրքիր թվեր կստանանք: Պետք է պարզել նաև, թե այդ ծաղիկների սերմերից ինչքան են գնում, ինչքանն է ցանվում… Դա ասֆալտի նման է: Մենք պետք է նաև նման խնդիրները փորձենք լուծել»,– ասաց Պ.Ղազարյանը:
Ի դեպ, Դավիթաշենում ԲՀԿ–ի քարոզարշավի ժամանակ մարդիկ մոտենում էին ավագանու անդամներին և անձամբ քաղաքապետի թեկնածու Նաիրա Զոհրաբյանին հայտնում իրենց մտահոգությունների մասին: Մասնավորապես, սուպերմարկետների հարակից շենքերի բնակիչները բողոքում էին հովացնող սարքավորումների շարժիչների աղմուկից, մյուսներն էլ իրենց գոհունակությունն էին հայտնում ԲՀԿ–ի ավագանու անդամներին՝ նշելով, որ իրենք վստահ են, որ եթե քաղաքապետ դառնա ԲՀԿ–ի թեկնածուն, ապա ապօրինի հարստացման ճանապարհով չի գնա ու չի թալանի մայրաքաղաքի բնակչին:
«Ձեր բյուջեն թալանել են, կոտրել են ձեր հույսը, ձեզ հետ երկար ճանապարհ եմ անցել, որպես լրագրող, որպես պատգամավոր, փորձել են սպանել ձեր ներսի քաղաքացուն: Ես այսօր կարող եմ քաղաքականացնել քարոզարշավը և ոչ մի մասնակից էդ դուխին չի դիմանա: Բայց կարևորը դա չէ, այլ այն, որ այդ վերելակներից օգտվում է և՛ հեղափոխականը, և՛ հակահեղափոխականը: Մենք գալիս ենք, որ ասենք՝ մեր վերելակներն են վատ, Երևանը շատ ցավեր ունի, Երևան, ցավդ տանեմ, մեր շարքերում կան մասնագետներ, որոնք գիտեն դրանց լուծման բանալիները: Մենք գալիս ենք Երևանի առջև կուտակված խնդիրները լուծելու, ոչ թե Երևանի ունեցվածքը թալանելու համար: Կարող եք գալ և ստուգել, որ ես մշտապես բնակվել եմ երկու սենյականոց «խրուշչովկա» բնակարանում: Դուք կարող եք 5 տարի հետո էլ գալ և տեսնել, որ ես կրկին այդ նույն բնակարանում եմ ապրում, և իմ տանը ոչինչ չի ավելացել»,– ասաց Ն. Զոհրաբյանը:
Մանրամասները՝ «Փաստ» օրաթերթի այսօրվա համարում
