Անարդարությանը վերջ դնելու համար ակնկալում ենք վարչապետի հանձնարարականները համապատասխան մարմիններին

Անտոն Սարոյանը ֆեյսբուքյան իր էջում գրում է.

Ահավասիկ մարազմի հասցված մի պատմություն, որտեղ ո՛չ տուժող կողմ կա, ո՛չ իրեղեն ու տեսանելի ապացույցներ, ոչ էլ անգամ բողոք, բայց կա մի աննորմալ ու տարրական տգիտությամբ և կամ ակնհայտ դիտավորությամբ փայլող դատաբժշկական փորձաքննություն, որը այնքան «զորեղ» է գտնվել, որ կարողացել է խախտել ՀՀ քաղաքացու իրավունքները և նրան արդեն բավականին երկար ժամանակ զրկել ազատությունից:

Խոսքը վերբերում է Գագիկ Ծառուկյանի թիկնազորի պետ Էդուարդ Բաբայանի և Վյաչեսլավ Հարությունովի հետ կապված, վերջերս անդադար շահարկվող պատմությանը:

Ինչպես նշեցինք, պատմությունը իրոք մարազմատիկ բնույթ է արդեն կրում: Նախ՝ աննախադեպ աղմուկը այս հարցի շուրջ անհասկանալի էր, քանի որ հիվանդանոցում հայտնված Հարությունովը, երբ տեղեկացել էր, որ միջադեպի մասին կեղծ լուրերը շատ հապճեպ կերպով տարածվում են , առաջին իսկ օրը կնոջ միջոցով անմիջապես շտապել է հերքել լրագրողների կողմից արված ենթադրությունները և պարզաբանել, թե ինչ է կատարվել իր հետ: Այնուհետև երկրոդ օրը, երբ մարդը ողջ-առողջ, իր իսկ ստորագրությամբ դուրս է եկել հիվանդանոցից, ինքն անձամբ է հանդիպել լրագրողների հետ, արել մեկնաբանություններ և հստակեցրել եղելությունը, որը ոչ մի աղերս չունի «ծեծ», «հարձակում», «քացու տակ գցել» ու նման շինծու վարկածների հետ, և որոնց հետևանքով է իբրև թե առաջացել կողոսկրի կոտրվածք ու ծակված թոք, ինչի մասին էլ արձանագրված է վերոնշյալ տխրահռչակ դատաբժշկական փորձաքննության մեջ: Հատկանշական է, որ մարդը լիարժեք շարժվում էր, և ձայնի որևէ խզում չկար նրա խոսքում, մի բան, որ առաջանում է թոքերի վնասվելու հետևանքով: Ընդ որում՝ պետք է հաշվի առնել, որ այս մարդու դեմքին ու մարմնին բռնության, ծեծի ոչ մի հետք , ոչ մի կապտուկ կամ բիծ չկար հիվանդանոցից դուրս գրվելուց ի վեր:

Այս օրից անցել է երկար ժամանակ, բայց Բաբայանը շարունակում է մնալ կալանքի տակ, իսկ Վյաչեսլավ Հարությունովը (կներեք արտահայտությանս համար) «մեռավ» իրավապահներին, դատարանին ու բոլորին բացատրելով, որ իրականությունը բոլորովին այլ է: Ու անհասկանալի է՝ ինչու ոչ մի կերպ հաշվի չեն առնում քաղաքացու ասածները: Իսկ պատճառաբանությունը դատական բժշկի կողմից տրված եզրակացությունն է, որ ֆանտաստկիայի ժանրի բոլոր հատկանիշներն ունի, շարունակում է մնալ որպես անդրդվելի իրավական փաստարկ:

Սա արդեն լրջորեն մտահոգիչ հարց է դառնում, կարևոր է, որ ՀՀ Վարչապետ Փաշինյանը ծանոթանա այս գործին ու կանխի տարիներ ի վեր մեր արդարադատության համակարգում արմատացած «կեղծ եզրակացություններ-ապօրինի կալանավորումներ» անընդունելի փոխգործակցությունից, որպեսզի անպատժելիության քարացած մթնոլորտնին վերջ տրվի։

Կարծում եմ՝ սա այն դեպքերից է, որ եթե չլինի վարչապետ Փաշինյանի հանձնարարականները համապատասխան մարմիններին, իրավապահ համակարգի պատասխանատու անձանց, ապա կեղծ դատաբժշկական փորձաքննություն իրականացրած անձնակազմը կշարունակի նման գործելաոճը։

Խնդրում եմ և հրավիրում եմ վարչապետ Փաշինյանի ուշադրությունը այս հարցին և հույս ունեմ, որ նրա հանձնարարականները, կտան իրենց ցանկալի արդյունքը։