2 տարի սպասում էինք մեր նամակների պատասխանին. դպրոցում վրդովված են, որ զինվորներն իրենց ծանրոցները չեն ստացել
ՀԱՍԱՐԱԿՈՒԹՅՈՒՆԱնահիտ Սարգսյանը Երեւանի համար 50 դպրոցի տնօրենի քարտուղարն է, լավ է հիշում այդ օրը. դասեր չկային, բայց ուսուցիչներն ու աշակերտները եկան դպրոց սահմանի զինվոների համար ծանրոցները հավաքելու համար: 2016-ի ապրիլն էր, չորսօրյա պատերազմից մի քանի օր էր անցել, բոլորն ազդված էին եւ ցանկանում էին օգնել զինվորներին:
«Մեր դպրոցը ինչպես եւ քաղաքի բազմաթիվ շատ դպրոցներ, դեղեր էր հավաքել, հագուստ, սնունդ, տաք ծածկոցներ. ամեն մեկը բերել էր այն, ինչ կարողացել էր: Մեր աշակերտները նամակներ էին գրել, ծնողներից մեկը փոքրիկ խաչեր էր բերել, որոնք նամակների հետ դրեցինք ծանրոցներում: Ես համակարգչով թղթերի վրա տպեցի մեր դպրոցի համարը, իսկ մյուսների վրա արդեն ձեռքով գրեցի, թե ինչ ենք դրել արկղերում»,- հիշում է Անահիտ Սարգսյանը:
Սնունդով եւ հագուստով 20-25 արկղ հավաքվեց: Երեք օր անց «Երկրապահ» կամավորականների միությունից մարդիկ տարան այդ արկղերը՝ խոստանալով սահման հասցնել:
«Խտացրած կաթով արկղն այնքան ծանր էր, որ մի քանի աշակերտներ չէին կարողանում այն բարձրացնել մեքենա տեղափոխելու համար»,- ասում է Անահիտը:
Որոշ ժամանակ անց դպրոցը «Երկրապահ»-ից շնորհակալական նամակ ստացավ: Աշակերտները մտածեցին, որ զինվորները ստացել են իրենց նամակներն ու ծանրոցները եւ գոնե նրանցից մի քանիսը կպատասխանեն այդ նամակներին: Բայց ոչ մի պատասխան չեղավ:
13-ամյա Հովհաննես Աղվանյանը նամակներից մեկի հեղինակն է: Ապրիլյան իրադարձությունների ժամանակ Հովհաննեսը 11 տարեկան էր եւ անհայտ զինվորին ուղղված նամակում գրել էր, որ հպարտանում է իրենով եւ պատմել էր, թե ինչ է ուղարկել իր ծանրոցում: «Փոքր նամակ էր, բայց լավն էր»,- խոստովանում է Հովհաննեսը:
«Երբ ես իմացա, որ ծանրոցները չեն հասել, շատ ցավալի էր, չէ որ մենք այդքան ժամանակ նրանց համար սնունդ էինք հավաքում, նամակներ գրում, իսկ դրանք բոլորը Մանվել Գրիգորյանի մոտ էին հայտնմվել...»:
13-ամյա Լուսինե Ավդալյանը եւ Գեւորգ Բոյաջյանը նույնպես զինվորներին նամակներ էին գրել. շնորհակալություն էին հայտնել ծառայության համար, ասում էին, որ հույս ունեն, որ շուտով տուն կվերադառնան եւ առողջ կվերադառնան:
«Մենք 2 տարի սպասում էինք մեր նամակների պատասխանին, բայց հետո իմացանք, որ նամակները չեն հասել», - վրդովվում է Գեւորգը: Լուսինեն էլ ասում է, որ թեեւ վիրավորական է, բայց հույս ունի, որ գոնե այն իրերը, որոնք դեռ հնարավոր է օգտագործել, կուղարկեն զինվորներին հիմա՝ 2 տարի անց:
Դպրոցի ուսուցիչները եւ աշխատակազմի աշխատակիցները նույնպես վշտացել են, երբ տեսանյութում տեսել են, թե ինչ բախտի են արժանացել իրենց ծանրոցները:
Ազգային անվտանգության ծառայությունը ԵԿՄ նախագահ Մանվել Գրիգորյանին պատկանող առանձնատներում եւ կառույցներում հայտնաբերել էր մեծ քանակությամբ զենք եւ զինամթերք, սննդամթերք եւ հագուստ, մի քանի տասնյակ մեքենաներ, ինչպես նաեւ աշակերտների կողմից զինվորներին ուղարկված սննդամթերքով եւ դեղամիջոցներով արկղեր: ԱԱԾ-ն հրապարակել էր տեսանյութ, որը հաստատում է այս փաստը:
«Ես չէի կարողանում հավատալ աչքերիս, մի քանի անգամ դիտել եմ տեսանյութը: Պարզապես անհնար է դրան հավատալ՝ ո՞նց կարելի էր: Մեր շրջանում երեխաները հիմնականում աղքատ ընտանիքներից են, կան երեխաներ, որոնք պատռված կոշիկով են դասի գալիս: Ինչպես կարելի է նման երեխաների հավաքած սնունդը արջերին եւ վագրերին տալ: Մենք շոկի մեջ ենք եւ չենք կարողանում հավատալ, որ գեներալը կարող էր նման բան անել», - խոստովանում է Անահիտ Սարգսյանը:
Ծանրոցներից 3-ը ուսուցիչները հանձնել էին սահմանին ծառայող շրջանավարտների մայրերին. կարծես թե այս տղաները միակն էին, որ ստացել են իրենց ծանրոցները:
Այս դպրոցում զինվորների համար առաջին անգամ չէին ծանրոցներ հավաքում: Ամեն տարի հայրենիքի պաշտպանի օրը աշակերտները եւ ուսուցիչները սահմանին ծառայող նախկին շրջանավարտներին հագուստ եւ սնունդ են ուղարկում: Ծանրոցներում հաճախ նամակներ են դրվում, որոնք պետք է ոգեւորեն զինվորներին: Մի քանի տարի առաջ զինվորներից մեկը ստացել էր նամակը եւ սոցցանցերում գրել, որ աշակերտից նամակ է ստացել եւ ուրախացել:
«Նա ոչ ոքի չգիտի այդ դպրոցից, անգամ չգիտի, թե որտեղ է գտնվում մեր դպրոցը, բայց նրան այստեղից գրել են, երբ նա դիրքերում էր եւ դա նրան հուզել էր», - հիշում է պատմության ուսուցչուհի Քրիստինա Գեւորգյանը:
2016-ին ուղարկված ծանրոցների հետ կատարվածը ուսուցիչների եւ աշակերտըների համար դաս է դարձել եւ այժմ նրանք այլ կերպ են վարվում: Համար 50 դպրոցի տնօրեն Սյուզաննա Հարությունովան պատմեց, որ այս տարի նրանք սնունդով, քացրավենիքով, հիգիենայի պարագաներով եւ այլ իրերով ծանրոցներ են հավաքել եւ անձամբ 15 զինվորների՝ նրանց շրջանավարտների, մայրերին տվել:
«Այս տարբերակով մեր ծանրոցները հաստատ կհասնեն հասցեատերերին»:
Հ.Գ.
Դպրոցի միջանցքի պատերին կախված են հերոսների նկարները՝ գեներալների, պատմական անձանց, զինվորների: Կա նաեւ Մանվել Գրիգորյանի նկարը:
«Հանենք, ինչ է...»,- ստենդին նայելով՝ միմյանց շշուկով ասում են ուսուցիչները:
