Վարչապետը՝ կենսաթոշակային համակարգի մասին. Փորձում ենք ժամանակ շահել
ՀԱՍԱՐԱԿՈՒԹՅՈՒՆ
Վարչապետ Նիկոլ Փաշինյանը պարզաբանել է կառավարության դիրքորոշումը պարտադիր կուտակային կենսաթոշակային համակարգի հարցում:
«Սինոփսիս» ընկերության աշխատակիցների հետ հանդիպման ժամանակ ելույթ ունենալով՝ Նիկոլ Փաշինյանը նշեց, որ տեղյակ է, թե այդ համակարգն ինչպիսի քննարկումներ ու վեճեր է հարուցում: «Ցանկանում եմ պարզաբանել կառավարության դիրքորոշումը, որ հստակ լինի, թե մենք ինչ ենք ասում: Մենք ժառանգել ենք կոնկրետ իրավիճակ, երբ օրենքը հուլիսի 1-ից ուժի մեջ է մտնում: Այսինքն՝ խոսքը շատ սեղմ ժամկետների մասին էր ինչ-որ բան ձեռնարկելու համար: Մեր որոշումն արտացոլում է ոչ թե մեր գլոբալ մոտեցումը, այլ նպատակը ժամանակ ստանալն է, որպեսզի հարցը բոլոր շահագրգիռ կողմերի հետ քննարկենք առանց ցեյտնոտի հանգիստ պայմաններում»,- նշեց վարչապետը՝ հավելելով, որ կառավարությունում կան նաեւ շատ հարգարժան նախարարներ, որոնք համարում են, որ օրենքը սահմանադրականության հետ խնդիրներ ունի:
Ըստ Նիկոլ Փաշինյանի` երկրորդ տարբերակը օրենքի ուժի մեջ մտնելը հետաձգելն է: Այս տարբերակը անարդար կլիներ նրանց համար, ովքեր արդեն համակարգում են: Օրենքի չեղարկումը բացասաբար կանդրադառնա ներդրումների վրա, սակայն եթե քննարկումների արդյունքում նման որոշում կայացվի, դա կարելի է անել երկու ամիս անց: «Իսկ եթե հիմա դա անենք, ապա հետո գործընթացը կանգնեցնել հնարավոր չի լինի: Մենք ժամանակ կշահենք՝ բոլոր նրբությունները հասկանալու համար: Այս դեպքում բոլորը կստանան վճարված գումարները, այդ թվում՝ նաեւ տոկոսները»,- նշեց Փաշինյանը:
«Երրորդ տարբերակն է թողնել ամեն ինչ այնպես, ինչպես կա: Ես գիտեմ, որ սա շատերի համար ցավոտ որոշում է: Ես ցավում եմ, որ մենք նման որոշում ենք կայացրել: Սակայն մենք կարող ենք քննարկել եւ փոխհամաձայնեցված կամ դրան մոտ որոշում կայացնել»,- հավելեց Փաշինյանը:
