Սեյրան Օհանյան․ Միակողմանի զիջումների մասին խոսք լինել չի կարող
ԱՄԵՆԱԸՆԹԵՐՑՎԱԾ
Անդրադառնալով վաղը Մոսկվայում կայանալիք Վլադիմի Պուտին - Սերժ Սարգսյան հանդիպմանը՝ Օհանյանն ասաց, որ Հայաստանի ռազմաքաղաքական ղեկավարության նպատակը և Լեռնային Ղարաբաղի ինքնորոշումը, անկախությունն ապահովելն է:
Ներկայացնելով Հայաստանի սկզբունքային դիրքորոշումը՝ նախարարն ասաց, որ միակողմանի զիջումների մասին խոսք լինել չի կարող․ - «Փաստ է, որ Լեռնային Ղարաբաղի խնդրի կարգավորման շրջանակներում բանակցային գործընթացի ակտիվացում ենք մենք տեսնում, և այդ ակտիվացման մեջ [ԵԱՀԿ Մինսկի խմբի] համանախագահ երկրները, Ռուսաստանի Դաշնության նախաձեռնությամբ այսօր աշխատանք են տանում, որպեսզի ԼՂ համակարտության խնդիրը լուծվի միայն ու միայն խաղաղ և քաղաքական ճանապարհով:
Մենք ամեն ինչ պետք է անենք, որպեսզի իրականության մեջ այն նպատակը, որ մենք այսօր ունենք՝ Լեռնային Ղարաբաղի հանրապետության ինքնորոշումը, ազատ, անկախ ապրելը Հայաստանի Հանրապետության հետ լայն համագործակցության և լայն կապի շրջանակներում ապրելը․․․ որպեսզի այդ նպատակին մենք կարողանանք հասնել:
Ես միշտ ասել և այսօր էլ ասում եմ, որ Լեռնային Ղարաբաղի հանրապետության վտանգի ենթարկվելու պայմաններում, այսինքն ագրեսիայի ևս մեկ անգամ սանձազերծման պայմաններում, և՛ Պաշտպանության բանակը, և՛ համագործակցության շրջանակներում հայկական բանակն ամեն ինչ անելու են, որ Ղարաբաղի յուրաքանչյուր թիզ հողը պաշտպանվի»:
Օհանյանը նաև ասաց, որ Ռուսաստանի կողմից տրված 200 մլն դոլար վարկի շրջանակներում բոլոր պայմանագրերը ռուսական կողմի հետ կնքված են, և զենքի մատակարարումը Հայաստան արդեն սկսվել է՝ առանց, սակայն, մանրամասնելու, թե ինչ զինատեսակների մասին է խոսքը․ - «Ինչ վերաբերում է այն հարցին, որը որ իրականության մեջ շրջանառության մեջ է արդեն երկար ժամանակ՝ վարկի տրամադրմանը Ռուսաստանի Դաշնությունից և դրա շրջանակներում սպառազինության և ռազմական տեխնիկայի ձեռք բերմանը, գրեթե ամբողջությամբ պայմանագրերը կնքված են, համաձայնեցված են, ներպետական գործընթացները ավարտված են:
Ամբողջությամբ այդ համաձայնությունները կան, աշխատանքները ընթացքի մեջ են: Դեռ ավելին՝ առկա միջոցներից, նաև նախկինում ձեռք բերված պայմանավորվածության շրջանակներում սպառազինության ներկրումն այսօր ընթացքի մեջ է և իրականացվում է: Ժամանակակից տեխնոլոգիաների ոլորտի հետ մենք համագործակցություն ենք իրականացնում, հատկապես ժամանակակից միջոցների դեմ պայքարի արդյունավետ մեխանիզմների ձևավորման համար:
Ես գտնում եմ, որ գոյություն ունեցող պայմանագրերը մեր ռազմավարական գործընկերոջ հետ համագործակցության շրջանակներում մանրակրկիտ ուսումնասիրվել, վերլուծվել են, և այդ ժամանակահատվածի համար բավականին լուրջ աշխատանք է կատարվել, և չէր կարող Հայաստանի ռազմաքաղաքական ղեկավարությունը այնպես աներ, որ այդ պայմանագրերում մեր շահերը լիարժեք ընդգրկված չլինեին: Եվ կարծում եմ, որ, հաշվի առնելով այդ ամենը, մեր ռազմավարական գործընկերը իր պայմանագրային պարտականությունները կատարելու է՝ եթե Հայաստանի Հանրապետությունը ագրեսիայի ենթարկվի»:
«Գիտեք, որ քառօրյա այս մարտական գործողությունները եղել են Լեռնային Ղարաբաղի հանրապետության տարածքում, շատ կարճ տևեց, և հենց նույն Ռուսաստանի Դաշնության նախաձեռնությամբ արվեց ամեն ինչ, որպեսզի այդ մարտական գործողությունները կանգնեցվեն, և շարունակություն չլինի:
Եվ դրա շարունակությունն է, որ այսօր բանակցային գործընթացը ինտենսիվացել է՝ խաղաղ, քաղաքական ճանապարհով կարգավորման համար», - եզրափակեց Հայաստանի պաշտպանության նախարարը:
