Հայաստանը դրական բրենդ է ստեղծել, որը պետք է պահպանել. Սվիտալսկի
ՀԱՍԱՐԱԿՈՒԹՅՈՒՆ
Հայաստանում տեղի ունեցածը խորը զարգացում էր, քանի որ այդ զարգացումների արդյունքում նոր դեմքեր եկան իշխանության։ Այս մասին այսօր՝ մայիսի 29-ին «Ազատություն ռադիոկայան»–ի հետ զրույցում հայտնել է Հայաստանում Եվրամիության պատվիրակության ղեկավար, դեսպան Պյոտր Սվիտալսկին։
«Դեռ խոսք չի գնում քաղաքական, սոցիալական քաղաքականության փոփոխության մասին, սակայն այս պահին կարող ենք ասել, որ փոխվել է մտածողությունը։ Մարդիկ մտածեցին, որ ժամանակ է ազատագրվել անցյալի մտածողությունից, անցյալի մնացուկներից, կարծում եմ՝ սա շատ խորքային զարգացում է, հատկապես երկարաժամկետ հեռանկարում։ Այն, ինչ տեղի ունեցավ երեք շաբաթ առաջ, ներթափանցեց մարդկանց միտքը։ Այս պահին մեծ մարտահրավերներ կան իշխանության եւ հասարակության առջեւ՝ թե ինչպես պահպանել ու պաշտպանել այս ձեռքբերումները»,–նշել է դեսպանը։
Սվիտալսկին նկատում է՝ արտաքին աշխարհի տեսակետից այն ինչ տեղի ունեցավ հզոր ազդակ էր Հայաստանի կողմից քաղաքական հասունության եւ հասարակական հասունության առումով։ Նրա համոզմամբ՝ վերջին իրադարձությունները Հայաստանի համար դրական բրենդ են ստեղծել, որը պետք է պահպանվի։
ԵՄ պատվիրակության ղեկավարը դրական է գնահատում, որ հայերը կարողացան իրենց քաղաքակրթական շահերը ավելի բարձր դասել կուսակցական եւ նույնիսկ անձնական շահերից։
Սվիտալսկին հաստատում է, որ որպես օտարերկրյա դիտորդ իր համար նկատելի էր, որ կար կուտակված դժգոհություն, հասարակությունը գոհ չէր տնտեսական զարգացման մակարդակից, իսկ աղքատության, գործազրկության բարձր մակարդակ էր։
