ԴԱՀԿ աշխատակիցները ազատամարտիկի տունը վերցրին ձեռքից՝ իրերը տեղափոխելով հարևանի տուն
ՀԱՍԱՐԱԿՈՒԹՅՈՒՆ
Այսօր ԴԱՀԿ աշխատակիցները Գետափնյա գյուղում գտնվող իր տնից վտարել են ազատամարտիկ Խաչիկ Գալստյանին: Թեեւ ամբողջ գյուղն այսօր ոտքի էր կանգնել դա թույլ չտալու համար, սակայն վերջում հաղթել է ԴԱՀԿ աշխատակիցների սառնասրտությունը: Գետափնյայի համայնքապետ Մկրտիչ Ազատյանից տեղեկացանք, որ Խաչիկ Գալստյանի իրերը տեղափոխել են հարեւանի տուն, իսկ նրա տունը վերցրել ձեռքից:
Արցախյան պատերազմի մասնակից Խաչիկ Գալստյանի խնդիրներն առաջացել են ինչ-որ մի վաշխառուից տոկոսով գումար վերցնելուց: Առողջական խնդիրները հոգալու համար վերցված պարտքով գումարի վերադարձը Գալստյանը նախ ուշացրել է, սակայն հետո, իր պնդմամբ, վերադարձրել է ոչ միայն վերցրած գումարը, այլեւ տոկոսներն էլ հետը:
«Ինձ հարեւանները պատմեցին, որ տոկոսներն էլ է տվել, բայց որ փաստաթուղթ չունի տալու մասին՝ հիմա խնդիր է առաջացել: Նա բողոքարկել է դատարանի վճիռը, սակայն ԴԱՀԿ-ն չի համբերում մինչ որոշում կայացվի: Ես էլ էսօր գնացի այնտեղ, բոլորը հավաքված էին, ասեցի չի՞ լինի մի- երկու օր համբերեք, մինչեւ դատ լինի, ասեց չէ, վճիռը կա, պիտի էսօր ազատեն»,- մեզ հետ զրույցում պատմեց գյուղապետը:
Խոսելով ազատամարտիկի սոցիալական վիճակի մասին՝ նա ընդգծեց, որ վիճակն այնքան էլ լավ չի: «Ինքն էլ կռված տղա է, վիրավորված՝ քանի տեղից: Մայրն էլ մեկ օր առաջ էդ պատճառով վատացել է, սրտի կաթվածով տեղափոխել են հիվանդանոց, հիմա պառկած է: Որ ասեմ վիճակները լավ է, լավ չի»,- ասաց գյուղապետը:
Նրա փոխանցմամբ՝ տունը, ուր տեղափոխել են ազատամարտիկի ընտանիքի իրերը՝ դատարկ էր. տանտերերը Ռուսաստանում են գտնվում:
