Եղնուկյանը պնդում է, որ ոստիկանների հետ բախման հետեւանքով կինը ուղեղի ցնցում է ստացել

Մաշտոցի պուրակում տեղի ունեցած միջադեպի ընթացքում այսօր վնասվածքներ ստացած 5 երեխաների մայր Ռուզաննա Եղնուկյանի ամուսինը՝ «Նոր Հայաստանի» ներկայացուցիչ Կարո Եղնուկյանը կարծում է, որ կինը ուղեղի ցնցում է ստացել: Քիչ առաջ նա մեզ հետ զրույցում փոխանցեց, որ իր պահանջով կնոջը դուրս են գրել Գրիգոր Լուսավորիչ բժշկական կենտրոնից եւ այժմ տուն են տեղափոխում:

«Եթե այդ հիվանդանոցում պնդում են, որ ուղեղի ցնցում չկա՝ այլեւս իմաստ չկա այնտեղ պահելու»,- ասաց Եղնուկյանը՝ հավելելով, որ չի բացառվում կնոջն այլ հիվանդանոցում էլ ստուգման ենթարկի:

- Պարոն Եղնուկյան, ինչպե՞ս է հիմա տիկին Ռուզաննան: Հիվանդանոցի փոխտնօրենն ասում է, որ վիճակը նորմալ է, որ որեւէ կար դրված չէ գլխին: Ինչո՞ւ եք մտածում, որ ուղեղի ցնցում ունի:

- Ճակատի վրա մեծ բացվածք է եւ 4 կար են դրել: Չգիտեմ ինչ է ասում փոխտնօրենը, բայց բժիշկը հիվանդանոցում էլ հայտարարեց, որ 4 կար է դրվել: Միակ բանը, որ կասկածանք է տալիս՝ ուղեղի ցնցման հարցն է: Բժիշկները պնդում են, որ ուղեղի ցնցում չունի: Ասում են, որ այն նշանները, զգացողությունները, որ հիմա կան՝ տրավմայի հետեւանք են: Իսկ նշանները հետեւյալն են. ինքը լույսին չի կարողանում նայել, գլուխն ուժեղ ցավում է, չի կարողանում նստել կամ քայլել՝ գլուխը պտտվում է: Ասում են, որ դա ուղեղի ցնցման հետ կապված չի, այլ ընդհանուր տրավմայի հետեւանք է:

- Խոսո՞ւմ է ձեր կինը:

- Հիմա արդեն սկսել է քիչ-քիչ խոսել: Երբ որ ես եկա, չէր խոսում: Հիմա խոսում է: Դա իր թուլության եւ գլխացավի հետ է կապված, որ չի ուզում խոսել, ոչ թե անգիտակից է:

- Իսկ ձեզ ասա՞ց, թե ով է հարվածել իրեն:

- Նա չի տեսել, թե ով է հարվածել:

- Իսկ մա՞րդ է հարվածել, թե՞ գլուխը գետնին է խփել:

- Տրամաբանությունը հուշում է, որ ոտքի հարված է դիպել նրան: Երբ որ մարդը գետնին պառկած է, չի կարող գետնից մի բան թռչել ու նրան կպնել, դա ոտքի հարված է:

- Ձեզ ինչո՞ւ բերման ենթարկեցին ոստիկանություն, պարոն Եղնուկյան:

- Ինձ բերման են ենթարկել Ռուզանին պաշտպանելու համար: Երբ որ ես տեսա, որ նա գետնին ընկած է եւ ոստիկանները գլխի վերեւով աջ ու ձախ են գնում՝ ես գնացի եւ ոստիկանին հրեցի, որ Ռուզանին ոտքի կանգնեցնեմ: Հաջողվեց հրել, բայց հետո ինձ բերման ենթարկեցին եւ Ռուզանը ոտքի չկանգնեց: Եվ փաստորեն ինձ բերման ենթարկելուց հետո, երբ դեռ Ռուզանը գետնին էր՝ ուժեղ հարված էր ստացել գլխին:

- Իսկ ինչո՞ւ էր գետնին:

- Գետնին էր գտնվում, որովհետեւ ոստիկանները ոչ մասնագիտացված մոտեցում ցույց տվեցին ակցիայի մասնակիցների նկատմամբ: Ասեմ ինչ եմ ուզում ասել. երբ որ 10 հոգի շղթաներով փաթաթում են իրենց եւ դնում են կողպեքներ, եւ հետո էլ պառկում են ու շղթան մեխում են գետնին՝ 5-րդ դասարանցին էլ կարող է հասկանալ, որ քաշելով էդ մարդկանց չես կարող ոտքի հանել: Ոստիկանապետը շատ է պարծենում, որ ոստիկանները պրոֆեսիոնալ են: Պրոֆեսիոնալ ոստիկանները պետք է բերեին հատուկ գործիքներ, կտրեին շղթաները, քանդեին այդ կողպեքները, մեխերը հանեին գետնից, նոր այդ մարդկանց բերման ենթարկեին, ոչ թե բռնեին ու քաշեին: Դրա հետեւանքն է, որ այսօր բոլոր շղթայված մարդիկ սալջարդեր ունեն եւ կտրվածքներ մատներին ու մարմնի տարբեր մասերին: Իմիջիայլոց, հարցնում եք՝ ինչու էր Ռուզանը գետնին գտնվում. երբ որ երիտասարդները գետնին պառկած էին՝ շղթայված, մեխված, նրանց ետեւում կանգնած էին Կանանց ճակատի անդամները (ներառյալ Ռուզանը)՝ պաստառ բռնած: Երբ որ ոստիկանները հարձակվեցին՝ կանայք հայտնվեցին գետնին: Նրանց տապալելուց հետո ոստիկանները սկսեցին շղթան քաշել, այնտեղ եղավ խառնաշփոթ. շղթան Ռուզանի ձեռքին էր փաթաթվել այն դեպքում, երբ Ռուզանը շղթայի հետ գործ չուներ, ինքը պլակատ բռնող էր: Դա կարեւոր հանգամանք է, որովհետեւ երբ որ դու էդպիսի ոչ մասնագիտական գործ ես անում՝ քաշքշում ես մարդկանց, էդ շղթան էլ կարող էր մեկի վզին փաթաթվել՝ խեղդվեին: Հիմա Ռուզանի ձեռքին սալջարդ կա, որովհետեւ շղթան փաթաթվել էր ձեռքին եւ քաշել էին: Այսինքն ոստիկանների կողմից ցուցաբերվեց վայրենի, ոչ մարդկային, ոչ համաչափ մոտեցում: Մենակ «հարգելիս» ասելով չի: Պետք է նաեւ գործով հարգանք ցույց տալ:

- Ոստիկանությունը բաժնում ի՞նչ գործողություն իրականացրեց ձեր եւ մյուս 13 բերման ենթարկվածների նկատմամբ:

- Ոստիկանությունը ինձ ընառաջեց եւ ինձ շուտ ազատ արձակեցին՝ իմանալով, որ կինս հիվանդանոցում է եւ հասկանալով, որ ես պետք է հասնեմ հիվանդանոց: Դրա համար ես տեղյակ չեմ ինչ գործողություններ են իրականացվել: Ես բացատրություն չեմ տվել, միայն անուն-ազգանուն–հասցե եմ տվել: Ստուգեցին գրպաններիս պարունակությունը, ստուգման թուղթն եմ ստորագրել: Այդքան բան:

- Էսօրվա ակցիան ի՞նչ նպատակով էր: Ի՞նչ արդյունք եք ակնկալում այդ գործողություններից:

- Ակցիան քաղբանտարկյալների ազատության համար էր եւ հատկապես Գեւորգ Սաֆարյանի, որը ոստիկանական սուտ ցուցմունքի հետեւանքով այսօր գտնվում է ճաղերի հետեւում եւ պետք չէ, որ նա այնտեղ լինի: Հակառակը՝ սուտ ցուցմունք տվող ոստիկանը պետք է այնտեղ լինի: Սա նորից ցույց է տալիս ոստիկանական ոչ պրոֆեսիոնալ գործողությունների հետեւանքը: Եվ բողոքը դրա համար էր: Ես վստահ եմ, որ այս բողոքները չեն դադարելու, շարունակվելու են: Ես վստահ եմ, որ ջահելները, որոնք սա կազմակերպել էին՝ շատ ավելի հմուտ բաներ պիտի մտածեն եւ ոստիկանների համար շատ ավելի դժվար հարցեր դնեն: Իհարկե ամեն ինչը օրենքի սահմաններում: Քաղաքացիները իրավունք ունեն իրենց բողոքն արտահայտել խաղաղ ձեւով, ինչպես այսօր: Ոստիկանները պարտավոր էին այդ կանանց պաշտպանել, ոչ թե վնասել այն քաղաքացիներին, որոնք արտահայտում են իրենց քաղաքացիական պարտքը եւ խաղաղ անհնազանդության մեթոդով իրեք իրենց շղթայել էին փողոցում: Այդ մարդկանց պետք էր պաշտպանել, որ հանկարծ մի մեքենա չանցնի իրենց վրայով, ոչ թե քաշքշել եւ վնասել:

- Նման ակցիաներով հնարավո՞ր է հասնել որեւէ բանի: Ի՞նչ է պատրաստվում անել «Նոր Հայաստանը»:

- Այո, որովհետեւ միայն այսպես է հնարավոր հասնել մի բանի: Դատարանները բոլորը թելադրանքով են աշխատում, ոստիկանությունն աշխատում է հրահանգով. հրահանգում են քաշել՝ քաշում են, հրահանգում են խփել՝ խփում են, հրահանգում են կրակել՝ կրակում են՝ ինչպես Մարտի 1-ին, հրամայում են մարտի 1-ին ծաղիկներ բերել՝ ծաղիկներ են բերում: Անում են այն, ինչ իրենց հրամայում են՝ ոչ ավել, ոչ պակաս: Ոստիկաներին այսօր հրամայել էին ինչքան հնարավոր է շուտ փողոցից հեռացնել ակցիայի մասնակիցներին՝ առանց հաշվի առնելու հետեւանքները ինչ կլինեն:

Հիշեցնենք, որ այսօր Մաշտոցի պուրակի մոտ բախում տեղի ունեցավ ի պաշտպանություն Գեւորգ Սաֆարյանի բողոքի ակցիա անցկացնող ակտիվիստների եւ ոստիկանների միջեւ: Ռուզաննա Եղնուկյանը վնասվածք ստացավ, իսկ 14 հոգի ոստիկանություն տեղափոխվեցին: Ավելի ուշ նրանց ազատ արձակեցին: