ՊՊԾ գնդի վրա գրոհից եւ Խորենացի փողոցի բախումներից տուժածներից 10-ն են հիվանդանոցում. 2-ի վիճակը ծանր է

Ոստիկանության ՊՊԾ գնդի տարածք «Սասնա ծռեր» խմբի անդամների զինված գրոհի հետեւանքով, ինչպես նաեւ հուլիսի 20-ին Խորենացի փողոցում ոստիկաների ու քաղաքացիների միջեւ բախումների հետեւանքով վիրավոր քաղաքացիներից այժմ հիվանդանոցներում են գտնվում 10 հոգի: Այս մասին այսօր` հուլիսի 24-ին, NEWS.am-ին հայտնել են ՀՀ առողջապահության նախարարության լրատվական բաժնից:

Այս պահի դրությամբ երկու հիվանդ է ծանր վիճակում: Նրանցից մեկը գտնվում է «Հերացի» թիվ 1 համալսարանական համալիրի վերակենդանացման բաժանմունքում բուժվող տուժածի վիճակը շարունակում է մնալ ծանր` արդեն որոշակի դրական շարժընթացով։

Մյուսը «Սասնա ծռեր» ջոկատի անդամ 26-ամյա Թաթուլ Թամրազյանն է, որը գտնվում է «Էրեբունի» բժշկական կենտրոնում: Էրեբունի բժշկական կենտրոնի Վերակենդանացման բաժանմունքի վարիչ Արմեն Մուրադյանը NEWS.am-ի թղթակցի հետ զրույցում նշել էր, որ հեռացրել են Թաթուլ Թամրազյանի ձախ երիկամը, հաստ աղիքի ձախ կեսը եւ կատարվել է պլեւրալ խոռոչի դրենավորում: Նա սկզբում եղել է ծայրահեղ ծանր վիճակում, մի շարք վիրահատությունների է ենթարկվել, այս պահին վիճակը կայունացել է: Արհեստական շնչառության ապարատից անջատվել է, սակայն վիճակը շարունակում է մնալ կայուն ծանր:

Հիշեցնենք, որ Խորենացի փողոցում հուլիսի 20-ի գիշերը տեղի ունեցած միջադեպի հետեւանքով Երեւանի բժշկական կազմակերպություններ է դիմել 51 տուժած, նրանցից 29-ը` ոստիկան էր։ Տուժածներից 15-ն անհրաժեշտ բժշկական օգնությունը ստացել էր ամբուլատոր պայմաններում։ Տարբեր վնասվածքներ ստացած 34 տուժած «Սուրբ Գրիգոր Լուսավորիչ», «Էրեբունի», «Երեւան», «Արմենիա» հանրապետական բժշկական կենտրոններում, «Հերացի» թիվ 1 համալսարանական համալիրում շարունակում էին հիվանդանոցային բուժումը։

Այս պահի դրությամբ ընդհանուր առմամբ հիվանդանոցում է գտնվում 10 մարդ։