Իրաքյան Քրդստանի ընտրական հանձնաժողովը հայտարարել է նախագահական ընտրություններն անժամկետ հետաձգելու մասին
ՄԻՋԱԶԳԱՅԻՆ
Իրաքյան Քրդստանի բարձրագույն անկախ ընտրական հանձնաժողովը հայտարարել է նախագահական և խորհրդարանական ընտրություններն անժամկետ հետաձգելու մասին, հաղորդում է gazeteduvar.com.tr կայքը:
Որպես գլխավոր պատճառ հանձնաժողովը նշել է նախագահի ընտրության համար թեկնածուների գրանցման բացակայությունը:
Նշենք, որ Քրդստանում անկախության հարցով հանրաքվեից հետո ստեղծված լարված իրավիճակի պատճառով խորհրդարանական ու նախագահական ընտրություններին մասնակցելու հայտերի ընդունման վերջնաժամկետը երկարաձգվել էր մինչև այսօր:
Այժմ ընտրական հանձնաժողովը հայտարարել է ընտրություններն անժամկետ հետաձգելու մասին:
Հիշեցնենք, որ սեպտեմբերի 25-ին Իրաքյան Քրդստանում տեղի ունեցած անկախության հարցով հանրաքվեին մասնակցած քաղաքացիների 93.29 տոկոսն «այո» է ասել անկախացմանը: Հանրաքվեին մասնակցել է ընտրողների 72,16 տոկոսը:
Անցյալ շաբաթ Իրաքի ուժերը սկսել են երկրի հյուսիսում գտնվող թուրքմեններով, արաբներով և քրդերով բնակեցված Քիրքուք շրջանի վրա գրոհը, որն Իրաքյան Քրդստանի ու Իրաքի միջև վիճելի տարածքներից մեկն է համարվում: Կարճ ժամանակ անց իրաքյան բանակին հաջողվել է վերահսկողություն սահմանել Քիրքուքի օդանավակայանի և կարևոր նավթահանքերի օբյեկտների նկատմամբ, իսկ քրդական «փեշմերգան» զանգվածայնորեն նահանջել է զբաղեցրած դիրքերից:
