Երեքամյա հայ փոքրիկը փրկել է ընտանիքին Նիսի ահաբեկչությունից
ԱՄԵՆԱԸՆԹԵՐՑՎԱԾ
Ֆրանսիայի ծովափնյա Նիս քաղաքում բնակվող մեր հայրենակցուհին` Քրիստինե Վասիլյանը, Sputnik ռադիոկայանին պատմեց, թե ինչպես է ճակատագրի բերումով փրկվել ահաբեկչությունից։
ԵՐԵՎԱՆ, 15 հուլիսի-Sputnik. Քրիստինե Վասիլյանը Ֆրանսիայի ազգային տոնի` Բաստիլի գրավման օրը կազմակերպված միջոցառմանը ներկա է եղել ամուսնու և երեխաների հետ։ Նրանք զբոսնել են, մտել մոտակա սրճարաններից մեկն ընթրելու, այնուհետև երեխաների հոգնածության պատճառով որոշել են վերադառնալ տուն։
«Ուշ էր արդեն, երեխաներս, հատկապես 3 տարեկան փոքրիկս, պետք է քնեին։ Միջոցառումը սկսվեց երեկոյան 10-ի կողմերը, և մենք ավտոբուսով վերադարձանք տուն։ Այնտեղ շատ մարդիկ կային։ Դե, սովորաբար նման միջոցառումների ժամանակ մարդիկ գալիս են ընտանիքներով»,- պատմեց Քրիստինեն։
Նրա խոսքով` թեև ահաբեկչությանն ինքն ականատես չի եղել, բայց այդ ամենը պատկերացնելով` ողջ մարմնով դողում է։ Մեր հայրենակցուհին մինչև հիմա չի հասկանում, թե ինչպես կարող էր բեռնատարը մտնել մի հրապարակ, որն ամբողջությամբ ցանկապատված էր ու շուրջբոլորը հսկում էին ոստիկանները։
ՔՐԻՍՏԻՆԵ ՎԱՍԻԼՅԱՆ
«Ասում են, որ մեքենան շարժվել է 70-80 կմ/ժ արագությամբ։ Մեծ մեքենա է եղել, նման արագության տակ երևի ոստիկանները չեն կարողացել կանգնեցնել այն, հարվածել է ցանկապատերին։ Մոտ 30 ոստիկանի կորուստ է եղել։
Դեպքի ականատեսները պատմում են, որ մեքենան անընդհատ աջ ու ձախ է արել, որ հնարավորինս շատ մարդու վրաերթի ենթարկի։ Երկու կիլոմետր քշելով ու միաժամանակ կրակելով` գնացել է»,- պատմեց ահաբեկչությունից ճակատագրի բերումով փրկվածը։
Քրիստինեն նշեց, որ Ֆրանսիայում վերջին ահաբեկչություններից հետո ֆրանսիացիների վերաբերմունքն օտարերկրացիների հանդեպ փոխվել է։ Հիշեցնենք, որ այս ահաբեկչության հեղինակը թունիսցի է։
Աղբյուր՝ Sputnik Armenia
