«Ուզում ես տեսնել՝ որտե՞ղ են... գերեզմանում, արի ցույց տանք». Էրդողանին հրավիրել են այցելել սպանված քուրդ բնակիչների ընտանիքներին
ՄԻՋԱԶԳԱՅԻՆ
Թուրքիայի քրդամետ Ժողովրդադեմոկրատական կուսակցության խոսնակ Օսման Բայդեմիրը մեղադրել է իշխանություններին Դիարբեքիրի նահանգի Լիջե շրջանում խաղաղ բնակիչների սպանության համար և հրավիրել նախագահ Ռեջեփ Թայիփ Էրդողանին այցելել մահացածների տները, գրում է demokrathaber.org կայքը:
Նշենք, որ օրերս թուրքական ԶՈւ-ն Լիջեի մի շարք գյուղերում «հակաահաբեկչական գործողություն» էր իրականացրել, որի ընթացքում, ըստ քրդամետ կուսակցության, մահացել էին խաղաղ բնակիչներ:
Մինչդեռ թուրքական կողմը պնդում է, որ զինվորականների կրակի տակ հայտնվածները Թուրքիայում ահաբեկչական համարվող «Քուրդիստանի աշխատավորական կուսակցություն» խմբավորման աջակիցներ են, որոնք համագործակցում էին գրոհայինների հետ:
Լիջեի դեպքերը մեկնաբանած Էրդողանն ավելի վաղ ասել էր. «Ո՞ւր են այդ խաղաղ բնակիչները, ցո՛ւյց տվեք ինձ»:
Դրան ի պատասխան քրդամետ կուսակցության խոսնակ Բայդեմիրը հրավիրել է նախագահին մահացածների տուն.
«Ուզում ես տեսնել՝ որտե՞ղ են... գերեզմանում: Արի ցույց տանք»:
Հիշեցնենք, որ ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն: Թուրք-քրդական հարաբերությունների սրման հերթական փուլը սկսվել է 2015-ի ամռանը:
Կազմակերպությունը 1978 թվականին հիմնադրել է Աբդուլլահ Օջալանը:
