Երկրում եկամուտներն ամենավատը ֆիքսում են Գեղարքունիքի մարզում. վարչապետ

Գեղարքունիքի եկամուտներն ամենավատն են հանրապետությունում. երեկ՝ օգոստոսի 25-ին, այս մասին հայտարարել է վարչապետ Կարեն Կարապետյանը Գեղարքունիքի մարզում, համայնքապետերի հետ հանդիպմանը:

Անդրադառնալով բյուջեի կատարողականին՝ Կարեն Կարապետյանն ընդգծել է, որ Երկրում եկամուտներն ամենավատը ֆիքսում են Գեղարքունիքի մարզում. «Ձեր բյուջեները լավը չեն, ավելին՝ շատ վատն են: 2018թ. բյուջեի պլանավորումը շատ խիստ հսկողության տակ ենք դնելու, որովհետև ուզում ենք ստեղծել հավասար գործընկերային հարաբերություններ: Մենք այս տարի մեր պարտավորությունները մինչև վերջ կատարելու ենք, բայց հրապարակավ նշելու ենք այն համայնքապետերին, որոնք իրենց պարտավորությունները չեն կատարում»:

Վարչապետն ասել է, որ իրենք հարգում են համայնքապետերի իրավունքները, նրանք ժողովրդի կողմից ընտրված ղեկավարներն են, բայց դա չի նշանակում, որ իրենք մի ռեժիմով պետք է ապրեն, հանրապետությունում մյուսները՝ այլ:  

Կառավարության ղեկավարն ընդգծել է, որ 2017 թվականի համար մարզի համայնքների սեփական եկամուտների աճը նախատեսվում է 9 տոկոս, այն դեպքում, երբ  մյուս մարզերում այդ թիվը տատանվում է 15-20 տոկոսի սահմաններում: «Մեր բոլոր համայնքապետերը պետք է հստակ իմանան, չի կարող լինել այնպես, որ հանրապետական բյուջեով եկամուտները հավաքագրվեն 100 տոկոսով և ըստ նախատեսվածի հատկացումներ կատարվեն համայնքներին, իսկ վերջիններս ինչպես ցանկանան հավաքագրեն, պլանավորեն», - նշել է Կարեն Կարապետյանը: Գործադիրի ղեկավարն ընդգծել է, որ 2018-ից համայնքների բյուջեի պլանավորման գործընթացն իրականացվելու է կոշտ հսկողության ներքո: