«ՆԱՏՕ-ի «մատը խառն է» Հայաստանի «դատարկագլուխ» ողջույնի հարցում»

Երևանը որոշել է սկսել Հյուսիսատլանտյան դաշինքի հետ մերձեցումը փոխելով զինվորական ողջույնի կարգը, մասնավորապես այն դարձնելով «ճիշտ ինչպես ՆԱՏՕ-ում» է, գրում է svpressa.ru–ն։ Այս «նորամուծության» էությունն այն է, որ զինծառայողներն այսուհետ պետք է հանեն գլխարկը և ձեռքը դնեն մերկ գլխին։ Ողջույնի այս ձևը կիրառվում է ՆԱՏՕ-ի անդամ մի շարք երկրների, հատկապես ԱՄՆ-ի զինված ուժերում։

Այս ծիսակարգը որդեգրել են նաև Մերձբալթյան երկրները, ինչպես նաև Ղազախստանն ու Ադրբեջանը։ Այժմ հայ զինվորականները ևս ստիպված կլինեն «հանել գլխարկները», թեև գոնե խոնարհվելու պահանջ չկա։

Ռուսական բանակում (և նախկինում խորհրդային բանակում) կար մի ասացվածք. «Դատարկ գլխով չեն ողջունում» (այսինքն առանց գլխարկի)։ Այս խոսքերն ուղղված էին հիմնականում նորակոչիկներին, ովքեր ծանոթ չէին զինվորական ողջույնի նրբություններին։ Եթե զինվորը գլխարկ չէր կրում կամ ձեռքերը զբաղված էին, թույլատրվում էր ողջունել շրջելով գլուխը և կատարելով քայլքի տարր։

Հայ զինծառայողները ոգևորված չեն բանակային հաստատված ավանդույթներից հրաժարվելու մտքից. շատ սպաներ վերապատրաստվել են ռուսական բանակում և հասկանում են ողջույնի իրական իմաստը։ Այնուամենայնիվ, գործընթացն ընթացքի մեջ է։ Երևանն այժմ ծրագրում է իր զորքերին ապահովել ՆԱՏՕ-ի չափանիշներին համապատասխանող համազգեստով, և հավանաբար երկար ժամանակ չի պահանջվի, մինչև օրակարգ կմտնի արևմտյան սպառազինություն ձեռք բերելու հարցը։

Այս պահին Հայաստանում ամենահրատապ խնդիրը «ռազմաբազայի» հարցն է, մասնավորապես ռուսական 102-րդ: Դրա իրավական կարգավիճակը գործող համատեղ համաձայնագրերով սահմանված է մինչև 2044 թվականը ։ Այնուամենայնիվ, Հայաստանի վարչապետ Նիկոլ Փաշինյանը սկսել է ակնարկել, որ Հայաստանն այլևս ռուսական զորքերի կարիքը չունի։ Հարկ է նշել, սակայն, որ Երևանում արևմտամետ ընդդիմության ներկայացուցիչները բազմիցս են բարձրացրել ռուսական ռազմակայանի վերացման հարցը։ Եվ ահա, վարչապետ Փաշինյանը միացել է ռուսական զինուժի դեմ ուղղված «բողոքներին»։ Արդյո՞ք սա նշանակում է, որ Մոսկվան դուրս կբերի իր զորքերը Հայաստանից՝ Հարավային Կովկասում իր ռազմական ներկայության միակ վայրից։ Տեսականորեն այո։ Նախագահ Պուտինն ինքն էլ է ակնարկել «եթե չեք ուզում, ապա մենք էլ չենք պնդի» մոտեցումը։ Այնուամենայնիվ, Երևանի ողջամիտ քաղաքացիները շահագրգռված չեն նման ելքով. նրանք չեն ցանկանում խզել Ռուսաստանի հետ բոլոր կապերը, թեև միաժամանակ հայացքն ուղղում են դեպի Արևմուտք։ Սա երկու ճամբարներում էլ ներկայություն պահպանելու փորձ է։ 

«Ահա մի թեմա մտորումների համար,- svpressa.ru-ին ասել է ռազմական մեկնաբան և վերլուծաբան Ալեքսանդր Սլադկովը,- մեր սահմանապահները պաշտպանում են ոչ միայն հայ-թուրքական սահմանահատվածը, այլ նաև Հայաստանի սահմանն Իրանի հետ։ Եթե մեր զորքերը հեռանան, նրանց տեղը կգրավեն ամերիկացիները։ Իսկ ի՞նչ է սպասվում Հայաստանին այդ հատվածում։ Պատերազմ, և դա միանշանակ։ Պատերազմ Իրանի և ԱՄՆ-ի միջև հայկական հողի վրա։ Շնորհավորում եմ իսկապես «հիանալի» ընտրություն է»։

Նյութը հրապարակման պատրաստեց Կամո Խաչիկյանը

www.1or.am