Հայ քաղաքագետը կասկածում է, որ ռուսական ռազմաբազան կհեռանա հանրապետությունից

Համաձայնագիրը նախատեսում է ռուսական ռազմաբազայի առկայություն Հայաստանում մինչև 2044 թվականը, իսկ երկրում ռուսական ռազմական ներկայության դադարեցումը հնարավոր է միայն երկու երկրների փոխադարձ համաձայնությամբ։ Այդ մասին nsn.fm-ին ասել է հայ քաղաքագետ և Երևանի Կովկասի ինստիտուտի տնօրեն Ալեքսանդր Իսկանդարյանը։

Հայաստանի վարչապետ Նիկոլ Փաշինյանը հայտարարել է, որ ներկայումս Հայաստանում ռուսական 102-րդ ռազմաբազայի առկայության անհրաժեշտություն չկա։ Մինչդեռ, Պետդումայի պաշտպանության հանձնաժողովի անդամ Անդրեյ Կոլեսնիկը ՌԻԱ Նովոստիին տված հարցազրույցում հայտարարել է, որ Հայաստանը չպետք է մեջք շրջի Ռուսաստանից և հրաժարվի Շիրակի ռազմաբազայից, քանի որ այն հակակշռում է Հայաստանին սպառնացող որոշ սպառնալիքներ։ Իսկանդարյանը կասկածում է, որ ռուսական ռազմաբազան կհեռանա Հայաստանից, չնայած այն այլևս հատկապես անհրաժեշտ չէ։ «Չեմ կարծում, որ դա հավանական է։ Համաձայնագրի համաձայն Հայաստանում գտնվող ռուսական ռազմաբազան կմնա մինչև 2044 թվականը։ Դրա դուրսբերումը պետք է որոշվի երկու կողմերի կամքով. ո՛չ Ռուսաստանը, ո՛չ էլ Հայաստանը չեն կարող միայնակ լուծել այդ հարցը։ Տեսականորեն, իհարկե, հնարավոր է պատկերացնել նման բան, բայց չեմ կարծում, որ դա այժմ հրատապ հարց է։ Ամեն դեպքում, չեմ կարծում, որ այսօր այն օրակարգում է։ Այդ բազան 19-րդ դարից եկող գծի մի մասն է։ Այն դեռևս արդիական էր խորհրդային տարիներին, քանի որ հարևան Թուրքիան ՆԱՏՕ-ի անդամ էր։ ԽՍՀՄ փլուզումից հետո խորհրդային, ապա նաև ռուսական զորքերի բազաները աստիճանաբար անհետացան։ Հիմա դրանք չկան ո՛չ Վրաստանում, ո՛չ էլ Ադրբեջանում. մնացել է միայն Շիրակի մարզում գտնվող բազան։ Իրավիճակն այժմ բոլորովին այլ է, քան այն ժամանակ, երբ այս գիծը արդիական էր», - ասել է Իսկանդարյանը հավելելով, որ այդ բազան խորհրդանշական դեր է խաղում Հարավային Կովկասում Ռուսաստանի ռազմական ներկայության մեջ։ «Ավելին, լոգիստիկ խնդիր. այդ բազան գտնվում է Հայաստանում, իսկ Հայաստանի և Ռուսաստանի միջև Վրաստանն է, ուստի յուրաքանչյուր փամփուշտի և յուրաքանչյուր զինվորի տեղափոխումը այդ բազա պետք է համաձայնեցվի երրորդ երկրի հետ։ Ես դժվարանում եմ պատկերացնել Ռուսաստանի և Թուրքիայի միջև պատերազմը Հայաստանի տարածքից։ Բայց այդ բազան կարևոր խորհրդանշական դեր է խաղում Հարավային Կովկասում ռուսական ռազմական ներկայության մեջ, այդ իսկ պատճառով այն մնացել է այստեղ», - ընդգծել է քաղաքագետը։

Եզրափակելով Իսկանդարյանը նշել է, որ այսօր Հայաստանի և Ադրբեջանի կամ Թուրքիայի միջև հակամարտությունը քիչ հավանական է։ «Իհարկե, հայ-թուրքական և հայ-ադրբեջանական հարաբերություններում կան խնդիրներ։ Իհարկե, Ադրբեջանի հետ հակամարտությունը վաղուց է, և կա փակ սահմանների խնդիր ինչպես Ադրբեջանի, այնպես էլ Թուրքիայի հետ։ Սակայն ինձ համար դժվար է պատկերացնել որևէ պատերազմ այս պահին», - նշել է նա։

Ավելի վաղ Ռուսաստանի արտաքին հետախուզության ծառայության մամուլի բյուրոն հայտնել էր, որ Եվրամիությունը պահանջում է, որ Հայաստանի իշխանությունները կրճատեն ռուսական բիզնեսի ներկայությունը ռազմավարական ոլորտներում։

Նյութը հրապարակման պատրաստեց Կամո Խաչիկյանը

www.1or.am