15-ամյա տղա է մահացել էներգետիկ ըմպելիքի օգտագործումից
ՄԻՋԱԶԳԱՅԻՆ
Ռուսաստանի Ուֆա քաղաքում 15-ամյա դպրոցականը վերակենդանացման բաժանմունք է տեղափոխվել էներգետիկ ըմպելիքների չափից ավելի օգտագործումից հետո։ Տեղական լրատվամիջոցների հաղորդմամբ՝ դեռահասը մի քանի բանկա էներգետիկ ըմպելիք է խմել՝ դպրոցական պարապմունքներին և մարզումներին պատրաստվելու նպատակով։ Շուտով նրա ինքնազգացողությունը կտրուկ վատացել է, և նա կորցրել է գիտակցությունը։
Բժիշկները պարզել են, որ տղայի օրգանիզմում արձանագրվել են լուրջ խանգարումներ, որոնք, ըստ նախնական գնահատականների, կապված են եղել մեծ քանակությամբ կոֆեին և շաքար պարունակող ըմպելիքների օգտագործման հետ։ Նա տեղափոխվել է վերակենդանացման բաժանմունք, որտեղ բժիշկները պայքարել են նրա կյանքի համար։
Մասնագետները նշում են, որ էներգետիկ ըմպելիքների չարաշահումը կարող է առաջացնել սրտի ռիթմի խանգարումներ, արյան ճնշման կտրուկ բարձրացում և նույնիսկ սրտի կանգ, հատկապես դեռահասների շրջանում, որոնց օրգանիզմը ավելի զգայուն է նման խթանիչ նյութերի նկատմամբ։ Գիտական հետազոտություններն ու մի շարք դեպքեր ցույց են տվել, որ մեծ քանակությամբ կոֆեինի արագ ընդունումը կարող է հանգեցնել վտանգավոր սրտային բարդությունների։
Դեպքը հերթական անգամ ուշադրություն է հրավիրել անչափահասների կողմից էներգետիկ ըմպելիքների օգտագործման վտանգների վրա։ Բժիշկները ծնողներին խորհուրդ են տալիս վերահսկել երեխաների կողմից նման ըմպելիքների օգտագործումը և զգուշացնել հնարավոր առողջական ռիսկերի մասին։
