«Կարգավիճակ չի լինի». Տոլստոյը խոսել է առանց Ռուսաստանի ԵՄ-ի Հայաստանի ապագայի մասին
ՔԱՂԱՔԱԿԱՆՈՒԹՅՈՒՆ
Վերջին ամիսներին Հայաստանը «լուրջ սխալ» է թույլ տալիս շրջվելով դեպի ԵՄ և ԱՄՆ ի վնաս Ռուսաստանի հետ հարաբերությունների: Այսդ մասին հայտարարել է Պետդումայի փոխխոսնակ Պյոտր Տոլստոյը խորհրդարանի ստորին պալատում կլոր սեղանի ժամանակ, գրում է rtvi.com–ը:
«Ցավոք, վերջին մի քանի ամիսների ընթացքում մի շարք հայտարարություններ և գործողություններ են եղել թե՛ խորհրդարանական ներկայացուցիչների, թե՛ ՀՀ գործադիր իշխանության կողմից, որոնք վկայում են երկրի ղեկավարության արագ վերակողմնորոշման մասին դեպի եվրոպական կամ ամերիկյան վեկտոր: Եվ մենք, իհարկե, ցավում ենք դրա համար, հաշվի առնելով այն, որ Հայաստանը մշտապես անտեսում է ՀԱՊԿ մակարդակով հանդիպումները», - հայտարարել է Տոլստոյը:
Նա նշել է, որ Երևանը «քայլեր է ձեռնարկում Եվրամիության հետ մերձեցման ուղղությամբ», միաժամանակ մերժելով խզել «ԵԱՏՄ-ի շրջանակներում Ռուսաստանի հետ գոյություն ունեցող արտոնյալ հարաբերությունները»: Տոլստոյը հավելել է, որ իր կարծիքով, Հայաստանի իշխանությունների փորձերը անմիջականորեն շփվելու Թուրքիայի և Ադրբեջանի հետ «ուղղակի սպառնալիք են ներկայացնում երկրի ինքնիշխանության համար», և որ եվրոպական ապագայի և առանց վիզայի ճանապարհորդության մասին խոսակցությունները «PR հայտարարություններ» են Հայաստանի իշխանությունների, այդ թվում վարչապետ Նիկոլ Փաշինյանի կողմից։
«Նախկին Խորհրդային Միության ոչ մի երկիր չի կարող պարզապես հաստատվել որպես պետություն առանց Ռուսաստանի հետ սերտ դաշնակցային հարաբերությունների։ Եվ Հայաստանը բացառություն չէ։ Այդ առումով, Հայաստանի ներկայիս քաղաքական ղեկավարության կողմից բարեկամական կապերից հրաժարվելը ինձ թվում է լուրջ սխալ», - ասել է խորհրդարանականը։
Նա նաև անդրադարձել է հանրապետությունում նախընտրական իրավիճակին: Թեկնածուների մեջ, նրա խոսքով, չկա մեկը, ով «հստակ և միանշանակ» խոսել է Ռուսաստանի հետ դաշինք կնքելու անհրաժեշտության մասին։ Տոլստոյը դրա մեղքի մի մասը բարդել է հենց Մոսկվայի վրա։ «Ես կարծում եմ, որ դրա մի մասը կարող է մեր մեղքը լինել, որ մենք չենք շփվել նման թեկնածուի հետ և չենք օգնել նրան ստեղծել քաղաքական հարթակ երկրի ներսում», - ասել է նա։ Փոխխոսնակը նաև հիշեցրել է պատմական համատեքստը. այս տարի լրանում է Թուրքմենչայի պայմանագրի 200-ամյակը, որի համաձայն Ռուսաստանը երաշխավորել է Հայաստանի անվտանգությունը: «Այդ ժամանակվանից ի վեր իրավիճակը շատ չի փոխվել», - նշել է Տոլստոյը։
Նա հայտարարել է, որ Երևանը կբախվի ծանր հետևանքների, եթե Ռուսաստանը «սկսի հեռանալ Հայաստանից», ուրվագծելով Ռուսաստանի Դաշնությունում բնակվող հայ քաղաքացիների համար կոնկրետ հետևանքները։ «Հետևանքները շատ ավելի ծանր կլինեն: Հայաստանի քաղաքացիների համար ներկայիս զիջումները, ինչպիսիք են երկարաժամկետ բնակությունը առանց գրանցման և պարզեցված աշխատանքը Ռուսաստանի Դաշնությունում, հիմնված են նրանց ռազմավարական դաշնակցի կարգավիճակի վրա: Եթե այդ կարգավիճակը այլևս չտրամադրվի, կամ եթե այն որևէ պատճառով վերանայվի Հայաստանի քաղաքական ղեկավարության նախաձեռնությամբ, ապա, իհարկե, նման արտոնությունները կչեղարկվեն, և հայ քաղաքացիները կենթարկվեն բոլոր օտարերկրացիների համար նախատեսված ընդհանուր միգրացիոն ռեժիմին», - զգուշացրել է նա։
Փոխխոսնակը նաև անդրադարձել է հանրապետությունում ռուսաց լեզվի հետ կապված իրավիճակին: Նա նշել է ռուսաց լեզվի դասարանների թվի կրճատումը և մի շարք հայ պաշտոնյաների կողմից ռուսերենի օգտագործման քննադատությունը։ Նրա խոսքով նման «հակառուսական հարձակումները» կասկածի տակ են դնում հայկական սփյուռքի և նրա բիզնեսի դիրքը Ռուսաստանում։ Տոլստոյը նաև վրդովմունք է հայտնել, որ մի շարք հայ քաղաքական գործիչներ, որոնց հետ նա անձամբ աշխատել է Ղարաբաղյան պատերազմի ժամանակ, այժմ մեղադրում են Մոսկվային «իրենց սեփական սխալների, սխալ հաշվարկների և աղետալի արդյունքների» համար։ «Կրկնում եմ. մենք հասկանում ենք, որ հայ ժողովրդի բավականին մեծ մասը համակրում է Ռուսաստանին և հասկանում է Ռուսաստանի պատմական դերը։ Եվ մենք ցավում ենք, որ ներկայիս վարչապետ Փաշինյանի շուրջ ձևավորված որոշակի քաղաքական խմբի ներկայացուցիչներ թույլ են տալիս իրենց նման հակառուսական հարձակումներ կատարել նախընտրական քարոզարշավի ընթացքում։ Վստահ եմ, որ նրանք որևէ լրացուցիչ միավոր չեն վաստակի հայ ընտրողների, մեր սիրելի, թանկագին հայ ժողովրդի աչքերում», - եզրափակել է նա։
Նյութը հրապարակման պատրաստեց Կամո Խաչիկյանը
www.1or.am
