«Հայաստանի ատոմային էներգետիկայի ոլորտի ապագան հարցականի տակ է»
ՔԱՂԱՔԱԿԱՆՈՒԹՅՈՒՆ
էներգետիկ անվտանգության հայ փորձագետ և քաղաքագետ Վահե Դավթյանի խոսքով Ադրբեջանի կողմից ատոմակայան կառուցելու որոշումից հետո Հայաստանի ատոմային էներգետիկայի ոլորտի ապագան հարցականի տակ է, գրում է 1prime.ru–ն։
Ավելի վաղ Ադրբեջանի էներգետիկայի նախարար Փարվիզ Շահբազովը, ելույթ ունենալով Անթալիայի դիվանագիտական ֆորումում, հայտարարել էր, որ երկիրը անցնում է նոր մոդելի և էներգետիկ անվտանգությունն ապահովելու է ոչ միայն ածխաջրածինների, այլ նաև էլեկտրաէներգիայի վերականգնվող էներգիայի աղբյուրների միջոցով։ Նա նաև հայտարարել է երկրի էներգետիկ խառնուրդում ատոմային էներգիան ներառելու որոշման մասին։ «Ըստ Ադրբեջանի էներգետիկայի նախարար Շահբազովի երկրի էներգետիկ հաշվեկշիռը հիմնված կլինի երեք բաղադրիչների վրա. ածխաջրածիններ, վերականգնվող էներգիա և «խաղաղ միջուկային էներգիա»։ Մինչդեռ, Հայաստանում, որը դեռևս տարածաշրջանում միակ երկիրն է, որն ունի «խաղաղ միջուկային էներգիա», այս գոյության առումով կարևոր ռազմավարական ոլորտի ապագան փաստացիորեն հարցականի տակ է դրվում», - գրել է Դավթյանը Ֆեյսբուքում։
Նրա խոսքով Մոսկվան հստակորեն հայտարարում է, որ եթե Երևանը շարունակի իր ներկայիս արտաքին քաղաքական կուրսը, ապա 2031 թվականից հետո Հայկական Ատոմային էլեկտրակայանի (ՀԱԷԿ) արդիականացումը կարող է դադարեցվել։ «Սա նշանակում է, որ նույնիսկ 2036 թվականի թվացյալ կանխատեսելի հորիզոնն է հարցականի տակ։ Հարցականի տակ է նաև ակտիվորեն առաջ մղվող մոդուլային ռեակտորի նախագիծը, որի ավարտին կպահանջվի առնվազն 7-8 տարի», - կարծիք է հայտնել փորձագետը։
Նրա կարծիքով այս գործընթացները տրամաբանական են և փոխկապակցված։ Նա կարծում է, որ էլեկտրաէներգիայի շուկայի ազատականացմանը կարող է հաջորդել էներգետիկ համակարգերի միավորումը Ադրբեջանի հետ, Հայաստանի ազգային ատոմային էներգետիկայի ոլորտի կաթվածահարությունը և Ադրբեջանից էլեկտրաէներգիայի ներմուծումը։
Նյութը հրապարակման պատրաստեց Կամո Խաչիկյանը
www.1or.am
