ԵՄ-ն կօգնի Հայաստանին 2026 թվականի ընտրություններում. «Ինչպես Մոլդովայում»

Եվրամիությունը կօգնի Հայաստանին պայքարել «ընտրություններին արտաքին միջամտության» դեմ 2026 թվականին, ինչպես դա արեց Մոլդովայի խորհրդարանական ընտրությունների ժամանակ, այդ մասին դեկտեմբերի 15-ին լրագրողներին հայտարարել է ԵՄ արտաքին ծառայության ղեկավար Կայա Կալասը, գրում է gazeta.ru–ն։ «Շուտով Հայաստանում ընտրություններ են, և ի՞նչ կարող ենք անել նրանց օգնելու համար։ Նրանք օգնություն են խնդրել չարամիտ ազդեցության դեմ պայքարում։ Այդ օգնությունը նման է այն օգնությանը, որը մենք տրամադրել ենք Մոլդովային», - նշել է Կալասը։

2026 թվականի դեկտեմբերի սկզբին հայտարարվեց, որ ԵՄ-ն Հայաստանին կհատկացնի 50 միլիոն եվրո արտաքին միջամտությունները, այդ թվում որոշակի «ռուսական կազմավորումների» կողմից, բացահայտելու և հակազդելու համար։ Դրանից առաջ էլ Կայա Կալասը հայտարարել էր ԵՄ-ի պատրաստակամության մասին բոլոր ոլորտներում խորացնելու իր գործընկերությունը Հայաստանի հետ։ Ապրիլի սկզբին ՀՀ նախագահ Վահագն Խաչատուրյանը ստորագրել է օրենք «Երկրի ԵՄ-ին անդամակցության գործընթացը սկսելու մասին»։ Հիշեցնենք, որ Հայաստանում խորհրդարանական ընտրությունները նախատեսված են 2026 թվականի հունիսի 7-ին: Մոլդովայի ընտրությունները տեղի են ունեցել 2025 թվականի սեպտեմբերի 28-ին: Այնտեղ ձայները գրեթե հավասարապես բաժանվել էին գործող նախագահ Մայա Սանդուի արևմտամետ «Գործողություններ և համերաշխության» կուսակցության և Ռուսաստանի հետ համագործակցության վրա կենտրոնացած ընդդիմադիր ուժերի միջև: Իշխող կուսակցությունը հաղթել էր փոքր առավելությամբ: Նրա հաղթանակը ապահովվել էր Եվրոպայում մոլդովական սփյուռքի ձայների շնորհիվ, մինչդեռ երկրի ներսում մեծամասնությունը քվեարկել էր ընդդիմության օգտին: Ընդ որում Ռուսաստանում, որտեղ ապրում է մոտ 400,000 մոլդովացի, այդ պահին բաց է եղել միայն երկու ընտրատեղամաս: Արդյունքում, բնականաբար, ընդդիմության ներկայացուցիչները մերժել են ընտրությունների արդյունքները և այդ քվեարկությունն անվանել են «նշանակում», այլ ոչ թե ընտրություն:

Նյութը հրապարակման պատրաստեց Կամո Խաչիկյանը

www.1or.am