Քաղաքագետ. կարո՞ղ է Փաշինյանը կորցնել իշխանությունը Հայաստանում

Պահանջվող 36 պատգամավորներից երեսունչորսը պաշտոնապես միացել են ՀՀ վարչապետ Նիկոլ Փաշինյանի իմպիչմենտի գործընթացին։ Այս մասին հայտարարել է «Պատիվ ունեմ» ընդդիմադիր խմբակցության ղեկավար Հայկ Մամիջանյանը, որը նախաձեռնել է գործընթացը։ «Հունիսի 7-ից մինչ օրս 34 պատգամավոր միացել է վարչապետի անվստահության քվեարկությանը», - նշել է պատգամավորը։ Խորհրդարանական հայտարարության նախագծում նշվում է, որ Փաշինյանի կառավարությունը չի կատարել իր պարտավորությունները և նաև չի կարողացել արդյունավետ արձագանք տալ երկրի առջև ծառացած խնդիրներին։ «Պատիվ ունեմ» խմբակցությունը կարծում է, որ ՀՀ վարչապետը և նրա կառավարությունը հաճախ իրենք են դարձել նոր մարտահրավերների պատճառ։ Ավելին, Փաշինյանին մեղադրում են ազգային անվտանգության ռազմավարությունը չիրականացնելու, Հայոց ցեղասպանության միջազգային ճանաչման գործընթացը խափանելու, բարեկամ պետությունների հետ երկկողմ հարաբերությունները վատթարացնելու, ժողովրդավարական սկզբունքներն ու մարդու իրավունքները խախտելու մեջ։

ԱՊՀ երկրների ինստիտուտի փոխտնօրեն Վլադիմիր Ժարիխինը vfokuse.mail.ru-ի թղթակցին ասել է, որ Փաշինյանը որևէ վտանգի մեջ չէ։ Նրա խոսքով, 34 ձայնը առավելագույնն է, որը կարող է հավաքել ընդդիմությունը։ «Չեմ կարծում, որ Փաշինյանը կարող է հիմա կորցնել իշխանությունը։ Հնարավոր է, որ դա տեղի ունենա ժամանակի ընթացքում, բայց այս պահին դա քիչ հավանական է։ Սա պատգամավորների առավելագույն թիվն է, որոնք կարող են քվեարկել իմպիչմենտի օգտին։ Բայց դա բավարար չէ։ Երկու ձայն նշանակում է երկու մարդ՝ նրանց դեռ պետք է համոզել։ Բայց անգամ դրանից հետո քիչ հավանական է, որ հաջողության կհասնեն, քանի որ եթե նրանք հնարավորություն ունենային, արդեն կօգտվեին դրանից», - ընդգծել է զրուցակիցը։

Ժարիխինը նաև նշել է, որ Հայաստանի վարչապետի վարկանիշն այժմ նվազում է։ Սակայն դա ևս բավարար չէ։

Նյութը հրապարակման պատրաստեց՝ Կամո Խաչիկյանը
www.1or.am