«Լեռներից բարձր վեճ. Հայաստանը հրաժարվում է հիշատակել Արարատ լեռը»
ՔԱՂԱՔԱԿԱՆՈՒԹՅՈՒՆ
Հայաստանը շարունակում է շարժվել դեպի Ադրբեջան և Թուրքիա։ Հաշտեցման քաղաքականության շրջանակներում նոյեմբերի 1-ից սկսած Երևանը կդադարի Արարատ լեռը պատկերել իր սահմանային դրոշմակնիքների վրա։ Արարատ լեռը, չնայած նրան, որ գտնվում է հարևան երկրում, Հայաստանում համարվում է ազգային խորհրդանիշ, գրում է iz.ru-ն։
Ընդդիմությունը կտրուկ է քննադատել այդ որոշումը։ ՀՀ խորհրդարանի անդամ Արթուր Խաչատրյանը հայտարարել է, որ կառավարությունը «պարում է թուրքական դուդուկի տակ» և որ դա Էրդողանի պահանջով է արվել։ Նախկին հատուկ հանձնարարություններով դեսպան Էդմոն Մարուքյանն էլ հայտարարել է, որ Թուրքիան երբեք չի բարձրացրել Արարատ լեռի պատկերման հարցը։ Նրա խոսքով, ներկայիս ՀՀ իշխանությունները կամավոր են «վերախմբագրում ազգային ինքնությունը» բոնուսներ ստանալու համար։ Սակայն մինչ այժմ այդ բոլոր ջանքերը սահմանափակ ազդեցություն են ունեցել։ Սեպտեմբերի կեսերին Թուրքիայի հատուկ ներկայացուցիչ Սերդար Քըլըչը այցելեց Երևան։ Կողմերը համաձայնեցին «պատրաստել պայմաններ» երկրների միջև օդային ուղևորափոխադրումների ավելացման և սահմանին երկաթուղու և էլեկտրահաղորդման գծերի ուսումնասիրություններ անցկացնելու համար։ Որոշ դիտորդների սպասումներին հակառակ՝ հարաբերություններում առաջընթաց չեղավ։
Հայ քաղաքագետ Տիգրան Քոչարյանը հիշեցրել է, որ Փաշինյանը առաջ է քաշում «իրական Հայաստանի» հայեցակարգը, որն առաջարկում է երկրի զարգացումը առկա պետական սահմանի սահմաններում։ «Արարատը չի տեղավորվում այդ հայեցակարգի մեջ, քանի որ այն գտնվում է Թուրքիայի տարածքում: Հետևաբար, նրա մասին հիշողությունը համակարգված կերպով ջնջվում է։ Ըստ երևույթին, վաղ թե ուշ գործը կհասնի նաև ազգային զինանշանի փոփոխությանը։ Դժբախտաբար, իշխանությունները չեն հասկանում մեր տարածաշրջանի առանձնահատկությունները։ Այստեղ անընդհատ զիջումների և փոխզիջումների գնալու պատրաստակամությունը չի գնահատվում։ Նման վարքագիծը համարվում է թուլության նշան և չի առաջացնում համարժեք պատասխան քայլեր, այլ ավելի ու ավելի շատ պահանջների է հանգեցնում», - բացատրել է փորձագետը։
Ռուսաստանցի Կովկասի հարցերով փորձագետ Արթուր Աթաևն էլ նշել է, որ Նիկոլ Փաշինյանը գործում է բավականին տրամաբանական։ «ՀՀ իշխանությունները փորձում են բարելավել հարաբերությունները հարևանների հետ՝ փոխելով իրենց մոտեցումները, այդ թվում՝ պետական խորհրդանշանների հարցում։ Ակնհայտ է, որ դա ցավոտ գործընթաց է, քանի որ կարևոր և վաղուց հաստատված գաղափարախոսություններն են հերքվում։ Բայց, ի վերջո, տարածաշրջանում կարող է հաստատվել նոր կարգ, որը կապահովի փոխադարձաբար ընդունելի համակեցություն Հայաստանի, Ադրբեջանի և Թուրքիայի միջև։ Ըստ երևույթին, հենց դրան է փորձում հասնել Նիկոլ Փաշինյանը», - կարծիք է հայտնել նա։
Նյութը հրապարակման պատրաստեց Կամո Խաչիկյանը
