Ռուսաստանի սահմանը մասնավոր ռազմական ընկերությունների օղակում. ԱՄՆ-ը կեղտոտ գործողություն է իրականացրել Հայաստանում
ՔԱՂԱՔԱԿԱՆՈՒԹՅՈՒՆ
Արևելագիտության մասնագետ, քաղաքագետ Սեմյոն Բաղդասարովը ուշադրություն է հրավիրել նրա վրա, որ Անդրկովկասի տարածաշրջանում Ռուսաստանի համար կարող են առաջանալ լուրջ ռիսկեր։ Նա նշել է, որ Զանգեզուրի միջանցքի 99 տարով ամերիկյան ընկերության վերահսկողությանը հանձնումը, որը նախաձեռնել է ՀՀ վարչապետ Նիկոլ Փաշինյանը, զգալի վնաս է հասցնում միանգամից երեք երկրների՝ Ռուսաստանի, Չինաստանի և Իրանի տնտեսական շահերին, գրում է Pravda.ru–ն։
Վերլուծաբանի խոսքով այդ տարածքը փաստացի անցնում է ամերիկյան իրավասության վերահսկողության տակ։ Նա նշել է, որ այնտեղ կգործի ամերիկյան մասնավոր ռազմական ընկերություն, որը կստանձնի վերահսկողության գործառույթները, այդ թվում անձնագրային և մաքսային հսկողությունը։ Դա թույլ կտա Միացյալ Նահանգներին հետևել և կարգավորել Չինաստանից և Կենտրոնական Ասիայի երկրներից եկող բոլոր բեռների հոսքերը։
Բացի այդ, Բաղդասարովը մտահոգություն է հայտնել Միացյալ Նահանգների կողմից 101-րդ օդադեսանտային դիվիզիան զորավարժությունների համար Հայաստան տեղափոխելու ծրագրերի վերաբերյալ։ Նա ենթադրել է, որ այդ դիվիզիայի ստորաբաժանումները կարող են տեղակայվել Զանգեզուրի միջանցքի մոտ, ինչը կհանգեցնի Ռուսաստանի սահմանի մոտ հզոր ամերիկա-թուրքական կամուրջ ստեղծելուն: Նրա գնահատմամբ նման իրավիճակը չափազանց անբարենպաստ հեռանկարներ է ստեղծում տարածաշրջանի համար։
Վերլուծաբանը նաև ընդգծել է, որ Լեռնային Ղարաբաղի Հանրապետության գոյությունը կարող էր կանխել նման միջանցքի ի հայտ գալը: Նա կարծում է, որ դրա լուծարումը Հայաստանում իշխանությունը փոխելուն ուղղված ծրագրի մի մասն էր։
Ըստ նրա, երկրի նախորդ ղեկավարությունը չէր համաձայնել նման քայլերի, ուստի արտաքին ուժերը նպաստեցին Նիկոլ Փաշինյանի իշխանության գալուն: Բաղդասարովը նշել է, որ հայկական վերնախավի մի մասը, որը աջակցում էր Փաշինյանին, իրականում լքել է ոչ միայն Լեռնային Ղարաբաղի, այլ նաև ամբողջ Հայաստանի ազգային շահերը: Նա հավելել է, որ այս գործընթացում նշանակալի դեր է խաղացել Երևանում գտնվող ամերիկյան դեսպանատունը, որը, նրա կարծիքով, աշխարհի ամենամեծերից մեկն է, և նպատակաուղղված է տարածաշրջանում Ռուսաստանի ազդեցությունը թուլացնելուն: Բաղդասարովը վստահություն է հայտնել, որ մոտ ապագայում Հայաստանում գտնվող ռուսական ռազմաբազային կարող են խնդրել լքել երկիրը, և դրա փոխարեն կհայտնվեն ամերիկյան ռազմական օբյեկտներ: Նա ընդգծել է, որ Ռուսաստանը չի կարող թույլ տալ, որ իր հարավային սահմանների մոտ նման վտանգավոր հենակետ հայտնվի։ Նրա կանխատեսումների համաձայն, եթե իրավիճակը զարգանա այդ ուղղությամբ, տարածաշրջանը կարող է բախվել հակամարտության, որն իր մասշտաբներով և հետևանքներով կգերազանցի ուկրաինական ճգնաժամը։
Նյութը հրապարակման պատրաստեց Կամո Խաչիկյանը
