Ազատի ջրամբարում ջրահեղձ եղած պատանին Արցախից բռնի տեղահանված էր. ընտանիքում 5 եղբայր են. մանրամասներ

Նոր մանրամասներ են հայտնի դարձել այսօր՝ հուլիսի 27–ին, Ազատի ջրամբարում 16–ամյա պատանու ջրահեղձ լինելու դեպքից։

NEWS.am–ի թղթակիցը հայտնում են, որ տղան չորս ընկերներով միասին եկել են այստեղ ձկնորսության և ինչ-որ պահի 16-ամյա տղան որոշել է լողալ ջրամբարում, ինչից հետո դեպքը տեղի է ունեցել։ Ականատեսները նշում են, որ ընկերներից մեկը փորձել է օգնել, սակայն չի կարողացել, ինչի հետևանքով էլ տղան ջրահեղձ է եղել։

Նախնական տեղեկություններով դեպքը տեղի է ունեցել ժամը 13:00-ի սահմաններում և ժամը 17:00-ի սահմանում տղայի մարմինը ջրամբարից հայտնաբերել են։ Այն այս պահին մեքենայում է, ժամանել են ոստիկանության աշխատակիցներ, քննչական գործողություններ են այս պահին ընթանում։

Նշենք, որ ջրահեղծ եղած պատանին Արցախից բռնի տեղահանված ընտանիքից էր, ապրում էին Ազատավան գյուղում, ընտանիքում հինգ եղբայր են։

Ոստիկանությունը հորդորեց քիչ առաջ, այստեղ

Դեպքի վայրում բազմաթիվ քաղաքացիներ կային, ոստիկանությունը հորդորեց տրանսպորտային միջոցներ դուրս բերել։ Հնարավոր է՝  առաջիկայում արգելվի այստեղ լողալը և հսկողություն իրականացվի, քանի որ, ինչպես ներկաներն էին նշում՝ առաջին դեպքը չէ, որ ողբերգական այսպիսի դեպք է տեղի ունենում։

Ավելի վաղ NEWS.am–ը հայտնել էր, որ այսօր՝ հուլիսի 27-ին, ժամը 13:07-ին ՆԳՆ ՓԾ Կոտայքի մարզային փրկարարական վարչության ճգնաժամային կառավարման կենտրոն ահազանգ է ստացվել, որ տղա երեխան ընկել է Ազատի ջրամբարը։

Դեպքի վայր են մեկնել Հատուկ ջրափրկարարական և հրշեջ-փրկարարական ջոկատներից երկու մարտական հաշվարկ և Հատուկ նշանակության փրկարարական աշխատանքների իրականացման կենտրոնի փրկարարական խումբը։

Ջրասուզակն ափից մոտ 4 մ հեռավորությունից դուրս է բերել 2008 թ․ ծնված քաղաքացու  դին։