Խաղաղության ստեղծում. Ռուսաստանը պատրաստ է նպաստել Բաքվի և Երևանի միջև կարգավորմանը
ՔԱՂԱՔԱԿԱՆՈՒԹՅՈՒՆ
Ռուսաստանը պատրաստ է նպաստել Հայաստանի և Ադրբեջանի միջև կարգավորմանը, «Iz.ru»-ին ասել է Ռուսաստանի Դաշնության փոխարտգործնախարար Միխայիլ Գալուզինը: Հիշեցնենք, որ հուլիսի 10-ին ԱՄԷ-ում Նիկոլ Փաշինյանը և Իլհամ Ալիևը քննարկել են հարաբերությունների կարգավորման հարցը: Նույնիսկ սպասվում էր, որ Երևանն ու Բաքուն կարող են խաղաղության համաձայնագիր ստորագրել: Այժմ կողմերը դրան ավելի մոտ են, քան երբևէ:
Համաձայնագրի կնքման հեռանկարների վերաբերյալ կարծիքները տարբերվում են: Այժմ Երևանն ու Բաքուն իսկապես ավելի մոտ են խաղաղության համաձայնագրի ստորագրմանը, «Iz.ru»-ին ասել է քաղաքագետ և արևելագետ Իկբալ Դուրրեն:
- Բայց այստեղ կարևորը այն է, թե որքանո՞վ է այդ համաձայնագիրը գործուն և երկարաժամկետ,- նշել է փորձագետը:
ՄԳԻՄՕ-ի Կովկասի խնդիրների և տարածաշրջանային անվտանգության կենտրոնի ավագ գիտաշխատող Նիկոլայ Սիլաևն էլ կարծում է, որ ստորագրումը դեռևս հարցականի տակ է:
- Եթե մի քանի ամիս առաջ երկու կողմերն էլ հայտարարել էին, որ համաձայնության են եկել խաղաղության պայմանագրի տեքստի շուրջ, բայց այս մի քանի ամիսների ընթացքում այն չեն ստորագրել նույնիսկ անձնական հանդիպման ժամանակ, ապա այստեղ ինչ-որ բան այն չէ, այսինքն, ստորագրման հավանականությունը փոքր է, - ասել է փորձագետը։
Դա, հավանաբար, պայմանավորված է Փաշինյանի դիրքորոշմամբ։ Մի կողմից, պայմանագրի ստորագրումը կօգնի Հայաստանի վարչապետին ստանալ միջազգային գործընկերների, այդ թվում Թուրքիայի աջակցությունը, որը ավանդաբար կողմ է Ադրբեջանին, ասում է Իկբալ Դուրրեն, մյուս կողմից, հնարավոր խաղաղության պայմանագիրը կսրի Փաշինյանի հարաբերությունները ընդդիմության հետ, նրանք դեմ են խաղաղության պայմանագրին ներկայիս պայմաններով, խորհրդարանական երեք խմբակցություններից երկուսը չեն աջակցում Հայաստանի վարչապետի արտաքին քաղաքականությանը։
Վերջերս էլ ընդդիմության հետ անհամաձայնությունները սրվել են Փաշինյանի և Հայ Առաքելական եկեղեցու հարաբերությունների վատթարացման ֆոնին։ ՀԱԵ-ն քննադատում է իշխանությունների քաղաքականությունը, հատկապես Ադրբեջանի հետ հարաբերությունների կարգավորման հարցերում։ 2024 թվականին հանրապետությունում տեղի են ունեցել բազմահազարանոց բողոքի ցույցեր Տավուշի մարզում սահմանի սահմանազատման պատճառով։ Դրանց կազմակերպիչը այժմ կալանավորված արքեպիսկոպոս Բագրատ Գալստանյանն էր։ Նրանից բացի, վերջին շաբաթներին Հայաստանում ձերբակալվել են արքեպիսկոպոս Միքայել Աջապահյանը և գործարար, եկեղեցու հովանավոր Սամվել Կարապետյանը։ Արդյունքում, բնակչության շրջանում Փաշինյանի վարկանիշը նվազում է։ Gallup International-ի հարցման արդյունքների համաձայն, Հայաստանի քաղաքացիների ավելի քան 67%-ը բացասաբար է գնահատում Փաշինյանի աշխատանքը, հարցվածների միայն 8.2%-ն է գոհ նրա գործունեությունից։
Նյութը հրապարակման պատրաստեց Կամո Խաչիկյանը
