Նիկոլի նյարդային արձագանքները բացատրել է քաղաքական ռազմավարը. Փաշինյանը զգում է, որ կարող է կորցնել իշխանությունը
ՔԱՂԱՔԱԿԱՆՈՒԹՅՈՒՆ
Հայաստանում պետական հեղաշրջման փորձ է իրականացվել, որը կազմակերպվել է «խաբեբաների խմբի» կողմից, բայց նրանց ծրագիրն անհաջող է եղել: Այդ մասին վարչապետ Նիկոլ Փաշինյանն է հայտնել իր սոցիալական ցանցերի էջում նշելով, որ այս միջադեպը պատմության մեջ կմտնի որպես «խաբեբաների կողմից ձախողված պետական հեղաշրջում», գրում է tsargrad.tv–ն:
Civic պորտալի տվյալներով՝ հայկական ընդդիմությունը պլանավորել էր տապալել Փաշինյանի կառավարությունը մի շարք ռուսական ընկերությունների և երկրի նախկին նախագահների աջակցությամբ: Հրատարակությունը ներկայացրել է «Հեղաշրջման ռազմավարություն» անվամբ փաստաթղթի սկանավորված տարբերակը, որտեղ պնդվում է, որ հեղաշրջման նպատակն էր իշխանությունը փոխանցել ժողովրդին և եկեղեցուն այն խլելով «Փաշինյանի ռեժիմից»։ Իրավիճակը սրվել էր հունիսին, երբ «Տաշիր» ընկերության նախագահ Սամվել Կարապետյանի դեմ քրեական գործ էր հարուցվել երկրում իշխանությունը զավթելու հրապարակային կոչ անելու մեղադրանքով և դատարանը որոշել էր գործարարին երկու ամսով կալանավորել։
Քաղաքական ռազմավար Ռամիլ Խարիսովը tsargrad.tv-ին տված հարցազրույցում բացատրել է Նիկոլ Փաշինյանի նյարդային արձագանքները։ Փորձագետը կարծում է, որ խաբեբաների կողմից հեղաշրջման մասին նրա հայտարարությունը կարելի է դիտարկել որպես իր դիրքերն ամրապնդելու և հասարակական կարծիքն իր օգտին մոբիլիզացնելու միջոց։ Փաշինյանը խաղում է բնակիչների հույզերի հետ, քանի որ զգում է իշխանությունը կորցնելու իրական վտանգ, ինչն էլ բացատրում է նրա նման հուզական արձագանքը։
Խարիսովը նաև մատնանշել է եկեղեցու հետ շարունակվող հակամարտությունը և ընդդիմության «արտաքին ուժերի», այդ թվում Ռուսաստանի հետ կապերի մեղադրանքները։ Նրա խոսքով Փաշինյանն այս բոլոր կետերն օգտագործում է իր քաղաքական հենարանն ամրապնդելու և իր հասցեին անընդհատ հնչող քննադատությունները չեզոքացնելու համար։ Ըստ փորձագետի Փաշինյանը ձգտում է ամրապնդել իր դիրքերը ներկայանալով որպես ներքին և արտաքին դավադրությունների զոհ, միաժամանակ շեղելով մարդկանց ուշադրությունը երկրի տնտեսական և սոցիալական խնդիրներից։ «Նման հռետորաբանությունը, իհարկե, կարճաժամկետ հեռանկարում աշխատում է։ Դա պահի տակ կրակը մարում է, բայց այս ամբողջ պատմությունը կարող է հանգեցնել հայ հասարակության ավելի մեծ պառակտման, ինչը երկարաժամկետ հեռանկարում կարող է ավելի անկայունացնել իրավիճակը», - եզրափակել է tsargrad.tv–ի զրուցակիցը։
Նյութը հրապարակման պատրաստեց Կամո Խաչիկյանը
