Փաշինյանը գնում է Աստծո դեմ. Եվրոպայի և Մերձավոր Արևելքի հայերը Կարապետյանի ձերբակալության մասին
ՔԱՂԱՔԱԿԱՆՈՒԹՅՈՒՆ
Սերբիայի, Լիբանանի և մի շարք այլ երկրների հայ համայնքի ներկայացուցիչները «Տաշիր» ընկերությունների խմբի ղեկավար Սամվել Կարապետյանի ձերբակալությունը դիտարկում են Ուկրաինայում ստեղծված իրավիճակի և Մերձավոր Արևելքում լարվածության համատեքստում, գրում է Eadaily.com–ը։
Սերբ հրապարակախոս Վլադիմիր Դիմիտրիևիչը նշել է, որ Կարապետյանի ձերբակալությունը հետխորհրդային տարածքում գտնվող բոլոր նրանց ճակատագրի ցուցադրություն է, ովքեր չեն հետևում Ռուսաստանի հետ դիմակայության ընդհանուր գծին։
Մասնագետը զգուշացրել է, որ այսօր արևելյան եկեղեցիները՝ քրիստոնյա ժողովուրդների հոգևոր միասնությամբ, գտնվում են գլոբալիստական կարգի հարձակման տակ։ Նա կարծում է, որ Հայաստանում տեղի ունեցող իրադարձությունները հարված են ոչ միայն Հայ եկեղեցու ղեկավարին, այլ նաև ամբողջ հայ ժողովրդին և նրա ինքնությանը։ «Այն ամենը, ինչ կարելի է ասել այս մասին` կարելի է տեսնել Ուկրաինայում, որտեղ այժմ արյունալի հալածանք է տեղի ունենում հավատքի նկատմամբ», - Դիմիտրիևիչի խոսքերն է մեջբերել Sputnik Serbia–ն։ Նա նաև մատնանշել է Հայաստանում տեղի ունեցողի ներքին պատճառները։ Մասնավորապես, Վլադիմիր Դիմիտրիևիչը դա կապում է վարչապետ Նիկոլ Փաշինյանի վերջին տարիների քաղաքական անհաջողությունների և Ղարաբաղի կորստի հետ։ Փորձագետը կարծում է, որ Հայաստանի վարչապետի համար ռուս գործարարի ձերբակալությունը հանրության ուշադրությունը շեղելու փորձ է։
Իր հերթին, Մերձավոր Արևելքի և Կովկասի հարցերով լիբանանահայ փորձագետ Յուսեֆ Դերդիյանը վստահ է, որ Փաշինյանը միտումնավոր է վերացնում իրեն սպառնացող գործարարներին և քաղաքական գործիչներին: Նա գործարարի ձերբակալությունը անվանել է զուտ քաղաքական գործողություն, հաշիվներ մաքրելու, Հայկական հարցը վերացնելու գործողություն։ «Կարապետյանը, լինելով ձեռնարկատեր, աջակցում է Հայ եկեղեցուն, մինչդեռ Փաշինյանը ոչնչացնում է հայկական արժեքները պարտադրելով եվրոպական իդեալներ», - ասել է նա Sputnik Arabic-ին տված հարցազրույցում։
Ըստ Յուսեֆ Դերդիյանի, այսօր եվրոպացիներն ու եվրոպամետները իրենք են հրահրում պատերազմներ՝ Ուկրաինայից մինչև Իրան, աջակցում են Իսրայելին` Իրանի վրա հարձակումներում, անտեսում մնացած ամեն ինչ։ Իսկ նրանցից տարբերվող Կարապետյանը պաշտպանում է արդարությունը։ Նա վստահ է, որ Փաշինյանը դուրս է գալիս հայ ժողովրդի և նրա արժեքների ընդհանուր գծից, զոհաբերում է Հայաստանի անկախությունը, ինքնիշխանությունը և տարածքները։ Փորձագետը կարծում է, որ Փաշինյանն օգտագործում է իր իշխանությունը երկրի բոլոր ոլորտները, այդ թվում դատական համակարգը, բանակը վերահսկելու համար, և այժմ ցանկանում է ենթարկեցնել եկեղեցին։ «Սա անընդունելի է։ Եվ կարող եմ ձեզ ասել, որ հանդիպումներ են անցկացվում սփյուռքի բոլոր հայկական ուժերին և կուսակցություններին միավորելու համար, բայց ոչ թե ռեժիմը փոխելու, այլ կոնկրետ անձին բացառապես ժողովրդավարական միջոցներով հեռացնելու համար», - ասել է նա։
Ալ-Ֆարաբիի քաղաքական և ռազմավարական հետազոտությունների կենտրոնի գլխավոր քարտուղար Մուխտար Գբաշին էլ հիշեցրել է, որ Կարապետյանի դեմ մեղադրանքները ներկայացվել են Հայ Առաքելական Եկեղեցուն աջակցելու նրա հայտարարության պատճառով։ Նա չի բացառել, որ «Կարապետյան հիմնադրամի» մասնակցությունը մի քանի եկեղեցիների և տաճարների վերականգնմանը և դրա ազդեցության ուժեղացումը Հայաստանում կարող էին մտահոգություններ առաջացնել իշխանությունների մոտ։ «Իշխանությունները գործարարի կողմից Հայ Եկեղեցուն աջակցությունը համարում են սպառնալիք», - ասել է նա։
Եվրոպայի հայկական միությունների ֆորումի և Սլովակիայի հայկական սփյուռքի նախագահ Աշոտ Գրիգորյանը` մեկնաբանելով «Տաշիր» ընկերությունների խմբի ղեկավարի ձերբակալությունը, նշել է, որ Կարապետյանը «շատ է օգնել Ղարաբաղին»։ «Բոլոր տվյալներով, նա այն մարդն է, ում պետք է շնորհվեն բարձրագույն պետական պարգևներ և շնորհակալություն հայտնեն իր արած ամեն ինչի համար։ Եվ վերջերս, երբ այդ թուրքոմանը... կամ չգիտեմ` ինչպես անվանեմ Նիկոլ Փաշինյանին (բայց մենք տեսնում ենք, որ նա հայ չէ)... երբ նա սկսեց հարձակում Հայ Առաքելական եկեղեցու վրա, պարզ է, որ դա ոչ մեկին դուր չեկավ։ Եվ մենք այստեղ նույնպես շատ ուժեղ արձագանքեցինք։ Եվ այն, ինչը Փաշինյանը սկսեց կաթողիկոսի [Հայ Առաքելական եկեղեցու ղեկավար], Էջմիածնի [Հայոց պատրիարքի նստավայր] դեմ, մենք ընդունում ենք որպես Աստծո դեմ կռիվ», - RT-ին ասել է Գրիգորյանը։ Նա հավելել է, որ «բոլոր եվրոպացի հայերը Սամվել Կարապետյանի կողմնակիցն են»։ Հիշեցնենք, որ Սամվել Կարապետյանը հունիսի 18-ին է ձերբակալվել Երևանում` երկու ամսով իշխանությունը զավթելու հրապարակային կոչ անելու մեղադրանքով։ Քրեական գործը հարուցվել է այն բանից հետո, երբ նա նախորդ օրը հրապարակավ հանդես է եկել Հայ Առաքելական եկեղեցու պաշտպանության օգտին։ Ի պատասխան Կարապետյանի եկեղեցուն ցուցաբերած աջակցության` վարչապետ Նիկոլ Փաշինյանը սպառնացել է «հեռացնել անառակ հոգևորականությանը» և նրանց «անառակ բարերարներին»։ Ռուսաստանի արտաքին գործերի նախարարությունը հայտարարել է, որ Մոսկվան ուշադիր հետևում է Կարապետյանի շուրջ ստեղծված իրավիճակին, ով նաև Ռուսաստանի քաղաքացիություն ունի։
Նյութը հրապարակման պատրաստեց Կամո Խաչիկյանը
