Ֆրանսիական հեռուստաալիքները փորձում են մուտք գործել Հայաստանի հանրային մուլտիպլեքս
ՔԱՂԱՔԱԿԱՆՈՒԹՅՈՒՆ
Երկու ֆրանսիական հեռուստաալիքներ փորձում են մուտք գործել Հայաստանի հանրային մուլտիպլեքս (հեռուստաալիքների անվճար փաթեթ): Իրավիճակը մանրամասն ներկայացրել է Հայաստանի Հեռուստատեսության և ռադիոյի հանձնաժողովի նախագահ Տիգրան Հակոբյանը ելույթ ունենալով Ազգային ժողովում, գրում է vestikavkaza.ru–ն։ Նրա խոսքով, այդ թեմային նվիրված արդեն մի քանի հանդիպումներ են եղել։ Դրանցից յուրաքանչյուրում Երևանի ներկայացուցիչներն իրենց ֆրանսիացի գործընկերների ուշադրությունը հրավիրել են Հայաստանի օրենսդրության այն պահանջների վրա, որոնց համաձայն օտարերկրյա լրատվամիջոցները չպետք է ներառվեն հանրային մուլտիպլեքսում։ Հակոբյանը նաև բացահայտել է այն, որ այդ երկու հեռուստաալիքներից մեկը նույն Arte France-ն է, որի ուղիղ եթերում վերջերս ցուցադրվել էր Հարավային Կովկասի քարտեզը, որում Հայաստանն իսպառ բացակայում էր։ Ավելի ուշ հեռուստաալիքը ներողություն էր խնդրել այդ սխալի համար։ Ըստ հանձնաժողովի ղեկավարի անհնար է պատկերացնել այն, թե ի՞նչ արձագանք կունենար այդ նույն հաղորդումը, եթե այն ցուցադրվեր հանրային մուլտիպլեքսով։
Հիշեցնենք, որ վերջերս հայտնի է դարձել, որ հայկական կողմը մտադիր է վերանայել ներկայումս գործող այն համաձայնագիրը, որի շրջանակներում ռուսական հեռուստաալիքներն են հեռարձակվում հայկական մուլտիպլեքսում։ Բարձր տեխնոլոգիաների նախարար Մխիթար Հայրապետյանի խոսքով, ռուսական կողմի ներկայացուցիչները հրավիրվել են Երևան, որտեղ խորհրդակցություններ կանցկացվեն պայմանագրում համապատասխան փոփոխություններ կատարելու շուրջ։ Նա հրաժարվել է մանրամասներ հաղորդել, սակայն նշել է հայկական կողմի առաջարկներից մեկը՝ Երևանը ռուսական կողմին առաջարկում է սկսել Հայաստանի Հանրային հեռուստատեսության հեռարձակումը ռուսական հանրային մուլտիպլեքսով: Մինչ այդ Հայրապետյանը զգուշացրել էր, որ եթե կողմերը նորամուծությունների շուրջ համաձայնության չգան, ապա Հայաստանում ռուսական հեռուստաալիքների հեռարձակումները կարող են դադարեցվել։
Հիշեցնենք, որ Հայաստանի բնակիչները հանրային մուլտիպլեքսով կարող են դիտել այնպիսի ռուսական հեռուստաալիքներ, ինչպիսիք են Channel One–ը, Kultura–ն և RTR-Planeta–ն: Բացի այդ, Հայաստանում հասանելի է «Միր» միջպետական ալիքը, որի կենտրոնակայանը գտնվում է Մոսկվայում։
Նյութը հրապարակման պատրաստեց Կամո Խաչիկյանը
