Փաշինյանը գազազել է՝ Գյումրվա ձախողումից հետո

Նախօրեին Գյումրիում կայացած ՔՊ միջոցառմանը Փաշինյանը կրկին հիշեց «նախկիններ-ներկաներ» դիսկուրսը, հայտարարեց, թե թիմ ընտրություններին մասնակցելու «ինքնահայտարարագրվածները» մեկ նպատակ ունեն՝ պաշտպանելու իրենց թալանածը։ Փաշինյանը, մասնավորապես, հիշել էր Գյումրիի նախկին քաղաքապետ Վարդան Ղուկասյանին, 2-րդ և 3-րդ նախագահներին, Միքայել Մինասյանին։

Այդ այցից հետո արդեն երեկ Երևանում Փաշինյանն աշխատանքային ժամերն օգտագործում էր սոցիալական ցանցերում գրառումներ անելու, ապա և շարքային օգտատերերին անձամբ պատասխանելու համար։ Նա առնվազն 3 գրառում է արել` անդրադառնալով Ռոբերտ Քոչարյանին և Սերժ Սարգսյանին։ «Երկու կիսամաշ դեմքեր իրենց շրջապատներով վիճում են, թե ո՞վ է ինձ իշխանության բերել, միմյանցից պահանջելով ասել ճշմարտությունը: Դուք ասեք ձե՞զ ով է ժամանակին իշխանության բերել՝ Հայաստանի Հանրապետության ժողովրդի ձայնը երբեք չստացած այ ընտրակեղծարար-ուզուրպատորներ»,- գրել է նա։

Կես ժամ անց Փաշինյանը կրկին նոր գրառում է արել. «Ինձ իշխանության ոչ ոք չի բերել: 2018 թ. Ժողովրդական, ոչ բռնի, թավշյա հեղափոխությունն իշխանության է բերել Ժողովրդին: Ես ընդամենը ժողովրդի իշխանության տեղապահն եմ և Ժողովուրդն ինձ ուրիշով կփոխարինի՝ երբ ցանկանա»:

Չհանդարտվելով վարչապետի պաշտոնը զբաղեցնող անձը ևս մեկ գրառում է արել։ «Ընտրակեղծարար-ուզուրպատորնե՛ր, չմոռանաք ասել, թե ձեզ իշխանության բերողներն ինչի՞ համար են ձեզ իշխանության բերել Հայաստանի Հանրապետությունում: Դուք դա չեք ասի, ես ասեմ. որ Հայաստանի Հանրապետությունը երբեք անկախ պետություն չլինի, որ պետություն չլինի ընդհանրապես», - գրել է նա։

Փաստացի, Փաշինյանն իր այս նյարդային ջղակծկումներով ապացուցում է, որ Գյումրիում հանդիպումները ձախողվել են, իսկ բազմիցս չարչրկված այս դիսկուրսն այլևս դուրս է եկել իր վերահսկողությունից, չի կարողանում նույնիսկ սեփական կողմնակիցներին համոզել։ Իհարկե, անգամ ամենամոլեռանդ նիկոլականները վաղուց այլևս չեն հավատում նախկիններին պատժելու Փաշինյանի ցանկությանը և տրամադրվածությանը։ 7 տարին բավական ժամանակ էր որևէ հանցագործություն բացահայտելու և մեղավորներին պատժելու համար, մինչդեռ որևէ քայլ փաշինյանական իշխանությունն այդ ուղղությամբ չի արել։

Մարգարիտա Զախարյան