Ինչու է Արցախցիների անձնագրերում գրվում Ադրբեջան
ՖՈՏՈ
Արցախցիների՝ ՀՀ քաղաքացիություն ստանալու և ծննդավայրը անձնագրային բաժնի ծառայողների կողմից կամայականորեն Ադրբեջան նշելու MediaHub-ի երեկ հրապարակ թեման՝ բուռն քննարկումների առիթ է դարձել։ Բռնի տեղահանված մեր հայրենակիցների հիմնական դժգոհությունը հետևյալն է․ անձնագրային և վիզաների վարչության ծառայողները չեն իրազեկում Արցախի քաղաքացիներին, որ անձնագրում հնարավոր է գրել ծննդավայրը՝ գյուղի կամ քաղաքի անունը, կամ ինչպես նրանց ծննդյան վկայականներում է՝ ԼՂԻՄ։
«Երբ Արցախից տեղահանվեցինք, որոշ ժամանակ մնացինք Հայաստանում, հետո որոշում ենք կայացրել մեր նոր կյանքը սկսել Ռուսաստանի Դաշնությունում։ Անձնագիրս, որը ստացել եմ Արցախի ոստիկանությունից, ծննդավայրը գրված էր Հայաստանի Հանրապետություն, հաշվառման վայրը՝ մեր քաղաքի անունը։ Անձնագիրս դեռ ժամկետի մեջ էր, բայց քանի որ պետք է տեղափոխվեինք՝ ՀՀ-ից ստացա նոր անձնագիր, միայն տանն եմ հասկացել, որ ծննդավայրը գրված է Ադրբեջան»,- MediaHub-ին ասում է Ելենա Թովմասյանը։
Նրա խոսքով՝ «Ադրբեջան» գրել են հիմք ընդունելով նրա ծննդյան վկայականը, որտեղ ծննդավայրը նշված է ԼՂԻՄ, որն այդ տարիներին որպես առանձին հայկական ինքնավար միավոր՝ գործում էր Խորհրդային Ադրբեջանի կազմում։
«Այսինքն, եթե հնարավորություն կար գրելու ԼՂԻՄ, ինչո՞ւ Ադրբեջան։ Դա հոգեբանական առումով շատ ծանր է ինձ համար, որովհետև Լեռնային Ղարաբաղի Ինքնավար Մարզն ուներ հայկական կարգավիճակ, իսկ միանգամից Ադրբեջան գրելը ենթադրում է հայկական Արցախի ուրացում»,- նշում է կինը, ով այժմ ընտանիքով ապրում է ՌԴ-ում։
Նա նաև տեղեկացրեց, որ բողոքարկելու դեպքում անձնագրայինի ծառայողները գրում են անձնագիրը ստացող քաղաքացու բնակավայրը՝ շրջանի կամ քաղաքի անունը։ Ինքը ժամանակ չի ունեցել, և դա է պատճառը, որ անձնագրում «Ադրբեջան» գրությունը մնացել է անփոփոխ։
«Կխնդրեի անձնագրայիններում ժամանակին իրազեկեն ու հնարավորություն տան մարդկանց ընտրելու, արդյո՞ք ուզում են գրված լինի ԼՂԻՄ, Ադրբեջան, կամ իրենց բնակավայրի անունը։ Թող մարդիկ որոշեն, ոչ թե ոստիկանության ծառայողը՝ առանց հաշվի առնելու անձնագիրը ստացողի ընտրությունը»,- հավելեց նա։
