Լուկաշենկոն՝ Նիկոլ Փաշինյանի «փրկիչ»
ՎԵՐԼՈՒԾՈՒԹՅՈՒՆՆԵՐ
Հայ հանրությունը հերթական անգամ ցնցումների մեջ է հայտնվել Բելառուսի նախագահ Ալեքսանդր Լուկաշենկոյի հայտարարություններից։ Բելառուսի նախագահը կրկին սրում է հայ-բելառուսական հարաբերությունները, բայց դրանով ոչ թե վնասում, այլ աջակցում է Նիկոլ Փաշինյանին։ Մամուլի ասուլիսում Լուկաշենկոն հաստատել է, որ աջակցել է Ադրբեջանին, քանի որ «ողջախոհության կողմից» էր։ «Ես զանգեցի Պուտինին, հարցրի՝ դու՞ ես դրդել, որ Փաշինյանը Ղարաբաղը ճանաչի Ադրբեջանի մաս: Նա ասաց, որ ոչ, ես կապ չունեմ: Ո՞վ էր նրա լեզվից քաշում նման բան ասել: Իլհամը պատրաստ էր ընդունել, որ Հայաստանը Ղարաբաղի վրա մեծ ազդեցություն ունենա, իսկ հետո՝ այսպիսի նվեր: Ո՞վ չէր օգտվի դրանից»:
Լուկաշենկոն հայտարարել է, թե Նիկոլ Փաշինյանը «սիրախաղ» է սկսել Եվրամիության հետ։ «Վտանգավոր խաղ է: Նա կկործանի Հայաստանը: Հանգստացրե՛ք նրան», - ասել է Լուկաշենկոն: Նա չի հերքել, թե Հայաստանի հետ նույն ռազմական կառույցում՝ ՀԱՊԿ-ում գտնվող երկիրն Ադրբեջանին զենք է վաճառել, ընդգծելով, որ բաց են եղել նաև Հայաստանի համար: «Ով փող է վճարել, նա էլ ապրանք է ստացել», - ասել է Բելառուսի գործող ղեկավարը:
Մի պահ վերացարկվելով Լուկաշենկոյի անունից՝ պետք է ընդունենք, որ մի շարք արձանագրումներ ոչ միայն լեգիտիմ են, այլև պարզ ճշմարտություն։ Ո՞վ, եթե ոչ Փաշինյանն է Արցախը ճանաչել Ադրբեջանի մաս՝ լեզու դնելով Ալիևի բերանն ու նոր կռվան նվիրելով։ Ո՞վ, եթե ոչ Փաշինյանն է, որ վտանգավոր խաղ է սկսել Արևմուտքի հետ՝ վտանգելով ՀՀ գոյությունը։
Բայց արդյո՞ք Բելառուսի տխրահռչակ նախագահն է, որ պետք է անի այս արձանագրումները։ Տպավորություն է, որ այս մասին խոսելով՝ Լուկաշենկոն պարզապես օգնում է Փաշինյանին, քարոզչական նոր գործիքներ տալով նրան։ Ու երբ որևէ մեկը բարձրացնում է այս հարցերը, անմիջապես կապում են Լուկաշենկոյի հետ։ Սա ընդամենքը «հումանիտար օգնություն» է Նիկոլ Փաշինյանին, որն էլ առատորեն օգտվում է դրանից։
Գոհար Մակարյան
