Ո՛չ գազ, ո՛չ նավթ և ո՛չ էլ ոսկի․ նշվել է մի ապրանք, որը թանկանում է նույնիսկ ավելի արագ, քան բիթքոյնը
ՏՆՏԵՍՈՒԹՅՈՒՆ
2024 թվականի վերջին կակաոյի հատիկները ցույց են տվել գների ամենաուժեղ աճը բոլոր համաշխարհային ակտիվների շարքում առաջ անցնելով մյուս առաջատարներից՝ բիթքոյնից և ԱՄՆ ֆոնդային շուկայից: 2024 թվականի սկզբից կակաոյի հատիկները թանկացել են ավելի քան երկու անգամ, իսկ դեկտեմբերի 18-ին դրանց գներն աճել են մինչև պատմական նոր բարձրակետ՝ 12,93 հազար դոլար մեկ տոննայի դիմաց, հայտնում է MarketWatch-ը, գրում է biz.nv.ua-ն։ Միևնույն ժամանակ, թանկացումները կանգ չեն առնում, քանի որ գյուղատնտեսական շուկայում վերջին 60 տարվա ընթացքում կակաոյի հատիկների ամենամեծ պակասն է նկատվում։ Կակաոյի հատիկների մարտ ամսվա ֆյուչերսային գինը կազմել էր մոտ 11,95 հազար դոլար մեկ տոննայի դիմաց։ Դա համապատասխանում էր տարեսկզբից գների աճին մոտ 2,9 անգամ։ Նույն ժամանակահատվածում բիթքոյնը թանկացել է 2,3 անգամ, մինչդեռ S&P 500 ինդեքսն աճել է 25 %-ից էլ պակաս։
Կակաոյի աշխարհի ամենամեծ արտադրող Կոտ դ'Իվուարի անբարենպաստ եղանակն է շարունակում մնալ այդ ապրանքի դեֆիցիտի հիմնական գործոնը: «Օվկիանոսի ռեկորդային տաք ջերմաստիճանը սրել է Արևմտյան Աֆրիկայում մշակաբույսերի առանց այն էլ դժվար իրավիճակը, և դա արդեն երկու տարի», - ասել է WeatherWealth տեղեկագրի հրատարակիչ Ջեյմս Ռոմերը:
Կակաոյի միջազգային կազմակերպությունը (ICCO) կանխատեսում է, որ 2023/2024 գյուղատնտեսական տարում կակաոյի հատիկների համաշխարհային արտադրության դեֆիցիտը կկազմի 478 հազար տոննա։ ICCO-ն ակնկալում է, որ կակաոյի համաշխարհային արտադրությունը տարեկան կտրվածքով կնվազի 13,1 %-ով, իսկ տարեվերջյան պաշարները կնվազեն 26,8 %-ով:
Այնուամենայնիվ այդ շոկոլադի արտադրության հիմնական բաղադրիչի գնի զգալի աճը դեռ չի ազդել պահանջարկի վրա, ասել է Teucrium-ի գործադիր տնօրեն Ջեյք Հենլին, առկա իրավիճակը բնորոշ է գյուղատնտեսական ապրանքների համար։ «Եղանակային ծանր պայմանները հարվածել են արտադրությանը, բայց պահանջարկը մնում է բարձր, - ասել է նա,- սպառողները չեն ցանկանում հրաժարվել այնպիսի բաներից, ինչպիսիք են սուրճն ու շոկոլադը»:
Նյութը հրապարակման պատրաստեց Կամո Խաչիկյանը
