Փորձագետը վարչապետի կադրային խառնաշփոթի մասին. Արևմուտքի հովանավորյալը կարող է «անակնկալ» մատուցել Փաշինյանին
ՔԱՂԱՔԱԿԱՆՈՒԹՅՈՒՆ
Հայաստանի կառավարությունում վերջին կադրային փոփոխությունները պայմանավորված են առաջին հերթին քաղաքական նպատակահարմարությամբ, այն է պայքար է ընթանում վարչապետ Նիկոլ Փաշինյանի հակառակորդների դեմ, այլ ոչ թե հաշվի է առնվում կոնկրետ գերատեսչության ղեկավարի զուտ մասնագիտական որակները, Sputnik Արմենիայի հետ զրույցում կարծիք է հայտնել քաղաքագետ Բենիամին Մաթևոսյանը, գրում է dzen.ru-ն։ Նրա խոսքով, Հայաստանում իշխող կուսակցությանն իշխանությունը պահելու համար շտապ անհրաժեշտ է «թշնամու» կերպար, որի դեմ «կռվելու» են գերատեսչությունների նոր ղեկավարները։
Հիշեցնենք, որ ավելի վաղ վարչապետ Նիկոլ Փաշինյանը հաստատել էր, որ հենց ինքն է նախաձեռնել մի շարք նախարարների ու որոշ գերատեսչությունների ղեկավարների, ինչպես նաև Բարձրագույն դատական խորհրդի նախագահի հրաժարականները։
«Վարչապետ Փաշինյանի կառավարության նիստի հայտարարություններից հասկացանք, որ մեզ սպասվում է լայնածավալ ռեպրեսիաների նոր փուլ թե՛ իշխող քաղաքական թիմի անդամների, թե՛ ընդդիմության դեմ: Ամենայն հավանականությամբ, ՆԳ նախարար Արփինե Սարգսյանը կարող է ռեպրեսիաներ իրականացնել ավելի լավ, քան իր նախորդը՝ Վահե Ղազարյանը: Արդարադատության նախարար Սրբուհի Գալյանն ավելի լավ է գլուխ հանելու դրանից, քան Գրիգոր Մինասյանը: Իսկ Աննա Վարդապետյանը դեռ գլխավոր դատախազ դառնալուց առաջ էր «խմբագրել» ՀՀԿ-ական նախկին պատգամավորի և նրա որդու դեմ հարուցված քրեական գործը, և այդ օրինակից երևում է, որ նա ունակ է նման քայլերի»,- կարծիք է հայտնել զրուցակիցը։
Մաթևոսյանի կարծիքով Հայաստանի իշխանությունները փորձում են ներքին թշնամիներ գտնել, քանի որ արտաքին թշնամիների «պաշարն» արդեն սպառվել է։ Այսինքն ժամանակին ամեն ինչում կամ ղարաբաղցիներն էին մեղավոր, կամ ռուսները։ Այժմ Լեռնային Ղարաբաղում հայեր չեն մնացել, բացի դա իշխանություններն այլևս չեն ստանում հասարակության կողմից ցանկալի բացասական արձագանքը Ռուսաստանի հասցեին հնչող մեղադրանքներին։ Ըստ այդմ, նույնիսկ իշխող թիմն է ընկել ներքին թշնամու կերպարի տակ, ասել է փորձագետը։
Միաժամանակ նա նաև չի բացառել, որ վարչապետ Փաշինյանը բարձր պաշտոնների է նշանակում կանանց, որպեսզի նորացված թիմն ավելի «ներկայանալի» երևա։
Հիմնական պարամետրերը, որոնց վրա կենտրոնանում է Հայաստանի կաբինետի ղեկավարը բարձր պաշտոններում նշանակումներ կատարելիս, հավատարմությունն է վարչապետին և քաղաքական կապիտալը՝ Արևմուտքի աջակցության տեսքով։
«Չէի ուզենա սեքսիզմ մտցնել մեր խոսակցության մեջ: Ստացվել է այնպես, որ Նիկոլ Փաշինյանը կանանց է նշանակում, դրա համար էլ մենք խոսում ենք, որ Հայաստանում հիմնականում կանայք են կարողացել գնալ անհրաժեշտ ճանապարհով և փորձ ձեռք բերել, ինչը նրանց դարձրել է առաջնահերթ թեկնածուներ ղեկավար պաշտոնների համար»,- նշել է Մաթևոսյանը։ Մեկնաբանելով Արփինե Սարգսյանի ՆԳՆ ղեկավարի պաշտոնում նշանակվելը, նա ընդգծել է, որ նոր նախարարը պետական կառավարման համակարգում ներգրավված է 2015 թվականից։ 2018-2019 թվականներին Սարգսյանը կրթական ծրագրերի է մասնակցել ԱՄՆ-ում, Մեծ Բրիտանիայում և Նիդեռլանդներում, իսկ դա շատ լուրջ քաղաքական կապիտալ է այսօրվա Հայաստանում, ասել է քաղաքագետը։ Նրա կարծիքով, հենց արևմտյան երկրներում դասընթացներին մասնակցությունն է դարձել այն ֆոնը, որը դրդել է վարչապետ Փաշինյանին նրան նշանակել ներքին գործերի նախարար։ Բացի այդ, Մաթևոսյանի դիտարկմամբ Պաշտպանության և անվտանգության հարցերի խորհրդարանական հանձնաժողովի նախագահ Անդրանիկ Քոչարյանը մինչև վերջերս Արփինե Սարգսյանին արդարադատության նախարարի պաշտոնում էր տեսնում։ Այսպիսով, փորձագետը գալիս է այն եզրակացության, որ բացի այն դասընթացներից, որոնք տեղի են ունեցել Արևմուտքում, ՆԳՆ նոր ղեկավարին աջակցում է նաև որոշակի լոբբի։ Ներքին գործերի նախարարի փոփոխության մեջ կարևոր դեր է խաղացել ևս մեկ գործոն, փաստն այն է, որ մի քանի տարի շարունակ նախկին նախարար Վահե Ղազարյանից բազմաթիվ բողոքներ են ստացվում «կոլեկտիվ Սորոսից»,- նշել է Մաթևոսյանը։
«Արդեն բավական ժամանակ է, ինչ արևմտամետ ուժերը պահանջում են, որ ՆԳՆ-ի ղեկավարի պաշտոնը փոխանցվի մեկ այլ «կադրի»։ Հարգարժան Արփինե Սարգսյանն այդ առումով համապատասխանում է այն պարամետրերին, որոնք թույլ են տալիս զբաղեցնել կարևոր պաշտոններ, ըստ էության, քաղաքական ուղու և համակարգում ներգրավվածության առումով նման հատկանիշներ են դրսևորվում բարձր պաշտոններում նշանակված մյուս կանայք ևս»,- ընդգծել է փորձագետը։
Ընդունելով, որ համաշխարհային քաղաքական պատմության մեջ հայտնի են «երկաթե կամքով» կանայք, Մաթևոսյանը համոզմունք է հայտնել, որ երբ խնդիր է դրված գործ ունենալ հակառակորդների հետ, և, ասենք, հանցավորության դեմ պայքարելը, ապա կարևոր չէ, թե ով է ղեկավարում այս կամ այն գերատեսչությունը՝ տղամարդ կամ կին: Այստեղ շատ ավելի կարևոր է քաղաքական հավատարմությունը։ Այդ համատեքստում նա չի բացառել, որ վերջերս Քննչական կոմիտեի ղեկավարի պաշտոնը լքած Արգիշտի Քյարամյանը կարող է առաջիկայում ղեկավարել այլ ստորաբաժանում։
Վերլուծելով իրավիճակը Մաթևոսյանը եկել է այն եզրակացության, որ բարձր պաշտոններ վստահելով նրանց, որոնք ոչ միայն հավատարիմ են անձամբ իրեն, այլ նաև վայելում են Արևմուտքի պաշտպանությունը վարչապետ Փաշինյանը հույս ունի, որ դրանով կարող է բարեկամական հարաբերություններ հաստատել արևմտյան երկրների հետ: Փորձագետը, սակայն, դա մոլորություն է համարում, քանի որ արևմտյան վստահված անձինք կարող են «խաղալ» ինչպես ընդդիմության, այնպես էլ իշխանությունների դեմ: «Եթե նշանակվի մի պաշտոնյա, ով հավատարիմ է Հայաստանի իշխանություններին, բայց ում, ասենք, լոբբինգ են անում դրսից, ապա հնարավոր է, որ նույն Նիկոլ Փաշինյանին ապագայում սպասեն մեծ «անակնկալներ»։ Սխալ է բարձր պաշտոններում նշանակել մարդկանց, ովքեր վայելում են Արևմուտքի պաշտպանությունը, և միևնույն ժամանակ կարծել, որ նրանք կաշխատեն միայն քեզ համար: Մեղմ ասած, դա սխալ է: Կոլեկտիվ Արևմուտքի գործունեության վառ օրինակներ են նախորդ իշխանությունների ճակատագիրը և 2018 թվականի իրադարձությունները»,- վստահ է քաղաքագետը։
Եզրափակելով նա կիսվել է ևս մեկ դիտարկումով, դա այն է, որ վարչապետ Փաշինյանը սոցցանցի իր էջում հայտարարել է Արփինե Սարգսյանին ՆԳՆ ղեկավարի պաշտոնում նշանակելու մասին դեռևս նախագահ Վահագն Խաչատուրյանի հրամանագրի պաշտոնական ստորագրումից առաջ։ Մաթևոսյանը դա համարում է Հայաստանում ավտորիտարիզմի հերթական հաստատումը, վարչապետը հասկացնում է, որ երկրում որոշումներ կայացնում է միայն ինքը չսպասելով կանոնակարգով նախատեսված ընթացակարգերին։
Նյութը հրապարակման պատրաստեց Կամո Խաչիկյանը
