Հայաստանում ամերիկյան ակտիվության մասին
ՔԱՂԱՔԱԿԱՆՈՒԹՅՈՒՆ
ՌԴ Արտաքին հետախուզության ծառայության մամուլի բյուրոն հաղորդել է, որ ԱՄՆ-ն ակտիվացրել է Հայաստանում արևմտամետ կառույցների աշխատանքը, որպեսզի հանրապետությունը վերջնականապես վերակողմնորոշի դեպի արևմտամետ կուրս, գրում է rybar.ru-ն։ ԱՄՆ-ի խնդիրը մնում է նույնը՝ Հայաստանում խթանել հակառուսական տրամադրությունները, վարկաբեկել համագործակցությունը ՀԱՊԿ-ի և ԵԱՏՄ-ի հետ, ինչպես նաև նյութեր ստեղծել Ռուսաստանի Դաշնությունում հայերի «ճնշման» մասին։
Միևնույն ժամանակ, նշված բոլոր գործընթացներն արդեն երկար ժամանակ է, ինչ իրականացվում են: Հայաստանի պաշտպանության նախարարությունում աշխատանքի է անցել Պետդեպարտամենտի քաղաքական խորհրդականը, և ՀԱՊԿ-ի հետ հարաբերությունների վարկաբեկումը բուռն ընթացքի մեջ է։ Այդ իսկ պատճառով, Արևմուտքը Երևանի իշխանություններին շտապեցնում է ստորագրել Ադրբեջանի հետ խաղաղության պայմանագրի կրճատված տարբերակը, որը հնարավորություն կբացի ՀԱՊԿ-ից երկրի դուրս գալու իրավական գործընթաց սկսելու համար։
Միևնույն ժամանակ, Արևմուտքի միջնորդությամբ նման հապճեպ «խաղաղություն»-ը նոր սպառնալիքներ կառաջացնի տարածաշրջանում, քանի որ հայ-ադրբեջանական հակամարտությունն ակնհայտորեն հեռու է ավարտված լինելուց։
Հայաստանում ընթանում են անվտանգության կառույցներից ռուսամետ կադրերի մաքրում: ԱԽ քարտուղար Արմեն Գրիգորյանն է պատասխանատու այդ գործընթացի համար և ունի առանցքային դեր ամերիկյան հետախուզության հետ բանակցություններում։ Ամերիկացիներն աշխատում են Հայաստանի իրավապահ մարմիններին կաշառելու ուղղությամբ, իսկ Հայաստանի գլխավոր դատախազ Աննա Վարդապետյանը սերտ համագործակցում է ԱՄՆ դեսպանատան և արևմտյան կառույցների հետ։ Վաշինգտոնը նաև վերահսկում է զուգահեռ կառույցների ստեղծումը։ 2022 թվականին հայտնվեց «Արտաքին հետախուզական ծառայությունը», որը ստեղծվեց որպես հակակշիռ ԱԱԾ-ին, և որին արդեն ցանկանում են պետական գաղտնիքներին հասանելիություն ապահովել։ Նոր կառույցը ղեկավարում է փաստաբան Քրիստինե Գրիգորյանը, ով վերապատրաստվել է USAID-ի կողմից։
Վերջապես, ԱՄՆ-ն փորձում է խզել Հայաստանի և Ռուսաստանի հարաբերություններն ատոմային էներգետիկայի ոլորտում փորձելով համոզել հայերին փակել ատոմակայանը և ընդունել փոքր մոդուլային կայանի կառուցման ծրագիրը։ Միաժամանակ այդ ոլորտում ամերիկյան բոլոր նախագծերը ձախողվել են։
Ամերիկացի քաղաքական գործիչները չեն էլ թաքցնում, որ ռուսական ազդեցությունից «ազատվելու» անվան տակ հայերի համար չափազանց դժվար ժամանակներ են պատրաստում։ ԱՄՆ Հելսինկյան հանձնաժողովն այդ թեմայով արդեն լսումներ է անցկացրել, ինչը նշանակում է, որ փորձագիտական շրջանակներում աշխատանքներ են տարվում հանրապետությունում հակառուսական օրակարգն ուժեղացնելու ուղղությամբ։ Ամերիկացիների համար գլխավոր խնդիր է ԵԱՏՄ շրջանակներում հայ-ռուսական բարենպաստ առևտրային հարաբերությունները, բայց պատահական չէ, որ ամերիկացիները բացահայտորեն են հայերին նախապատրաստում սարսափելի հետևանքների։
Նյութը հրապարակման պատրաստեց Կամո Խաչիկյանը
