«Ես իմ գործը չկարողացա անել, տունը կտամ նրան, ով քո պես միլիցուն կսպանի». սպանության փորձի մեջ մեղադրվող նախկին ամուսին

Ոստիկան, նախկին կնոջ սպանության փորձի մեջ մեղադրվող Հայկ Բեգլարյանն առաջադրված մեղադրանքը չի ընդունում: Այդ մասին այսօր Երևանի Աջափնյակ և Դավթաշեն վարչական շրջանների ընդհանուր իրավասության դատարանում գործով դատաքննությունն սկսվելուց հետո հայտարարեց Բեգլարյանը:

Մինչ մեղադրող դատախազը կհրապարակեր մեղադրական եզրակացության եզրափակիչ մասը, գործին ներգրավվեց հանրային պաշտպանի գրասենյակից փաստաբան Դավիթ Մնացականյանը, ով դատարանում կներկայացնի ամբաստանյալի շահերը:

Դատախազի կողմից հրապարակվեց մեղադրական եզրակացության եզրափակիչ մասը, ըստ որի՝ Հայկ Բեգլարյանը 2015 թվականի դեկտեմբերի 15-ին իր բնակարանում իրեն պարբերաբար խաբելու շուրջ վիճաբանել է նախկին կնոջ՝ Արևիկ Հ. հետ, որի ընթացքում ննջասենյակից վերցրել է նախապես թաքցրած ազոտական թթվով լցված ներարկիչը, աննկատ թիկունքից մոտեցել է, փորձել է ներարկել, սակայն նախկին կինն ասեղի ծակոցից հետ է շրջվել և ներարկիչի ասեղը կոտրվելու արդյունքում ներարկում չի կատարվել:

Հայկ Բեգլարյանին մեղադրանք է առաջադրվել ՀՀ քրեական օրենսգրքի 34-104-րդ հոդվածի 1-ին մասով, նրա նկատմամբ որպես խափանման միջոց է ընտրվել կալանավորումը: Դատարանի կողմից սահմանված ապացույցների հաջորդականության համաձայն՝ հարցաքննության հրավիրվեց տուժողը:

30-ամյա տուժողը դատարանում հայտնեց, որ ամբաստանյալի հետ 2006թ. գտնվել են փաստացի ամուսնական հարաբերությունների մեջ և համատեղ 3 երեխա ունեն:

Տուժողը հայտնեց, որ նախկին ամուսնու հետ մինչև ամուսնալուծվելը հաճախակի վիճել են, ամուսինը խմել է, ծեծի ենթարկել իրեն երեխաների ներկայությամբ, անհարգալից վերաբերմունք դրսևորել: Ամուսնու՝ նման վարքագծի պատճառը, ըստ տուժողի, խանդն է եղել:

Տուժողի խոսքով, ամուսնալուծությունից հետո նրանք չեն շփվել, սակայն ինքը չի արգելել, որպեսզի հայրը տեսակցի երեխաներին: Դեպքի օրն էլ երեխաներից մեկը գտնվել է հոր մոտ, տուժողը գնացել է նրան վերցնելու և հենց ամուսնու տանը վիճաբանություն է ծագել նրանց միջև, և ամուսինը, բռնելով իր ձախ ուսային հատվածից, ներարկիչով փորձել է ներարկել:

Թիկունքում ծակոցը զգալով կինը շրջվել է, ինչի հետևանքով ասեղը կոտրվել է, ամուսինն այդ պահին գնացել է ննջասենյակ և նորից վերադարձել, այս անգամ ներարկիչի մեջ եղած ազոտական թթուն լցրել է կնոջ ոտքին:

Տուժողի բղավոցները լսելով տանը գտնվող նրա սկեսուրը, լոգարանից դուրս է եկել և օգնել նախկին հարսին թիկունքում խրված ասեղը դուրս բերել: Տուժողը նաև նշեց որ այս ամենի ականատեսը եղել է իր մանկահասակ որդին:

Այդ ամենից հետո Հայկը դիմել է փախուստի, սակայն 3 օր անց նա նախկին կնոջը sms հաղորդագրություն է ուղարկել՝ «ես իմ գործը չկարողացա անել, տունը կտան նրան, ով քո պես միլիցուն կսպանի» բովանդակությամբ:

Տուժողը մեղադրող Կարեն Սաֆթալյանի հարցերին պատասխանելիս նշեց, որ նախկին ամուսինը նախկինում ևս իրեն սպառնացել է՝ ասելով՝ բենզին է լցնելու վրան, ոտքերն է կոտրելու, որ հաշմանդամ լինի:

Մեղադրանքի կողմի հարցերի սպառվելուց հետո գործին նոր ներգրավված պաշտպանը շարունակեց հարցեր ուղղել տուժողին, ինչն ակնհայտ զարմանք առաջացրեց նաև դատարանի մոտ, մի շարք հարցեր տալուց հետո պաշտպանը հայտարարեց, որ այս պահին հարցեր չունի:

Ամբաստանյալի կողմից տուժողին ուղղված հարցերից էլ պարզ դարձավ, որ նախկին կնոջը հետ դեպքի օրը նրանք վիճել են, ամուսինը նախկին կնոջն ասել է՝ «Թափառելու փոխարեն, երեխաներիդ տիրություն արա», ի պատասխան որի էլ տուժողն ասել է՝ «մայրդ է թափառում»:

Ամբաստանյալը պնդեց, որ նախկին կնոջն սպանելու նպատակ չի ունեցել, և ընդամենը ազոտական թթուն ներարկիչով բերել է, որ լցնի նրա ոտքերին:

«Պրինցիպ ա ընգել, ինչ…հենա միանգամից ցմահ դնեիք պրծնեինք»,- ասաց ամբաստանյալը:

Ի վերջո, ամբաստանյալի պաշտպանը միջնորդեց գործի նյութերին ամբողջությամբ ծանոթանալու համար իրեն ժամանակ տրամադրել և հնարավորություն՝ տուժողին հաջորդ նիստում ևս հարցաքննելու համար:

Դատարանը բավարարեց պաշտպանի միջնորդությունը, և հաջորդ դատական նիստը նշանակվեց հուլիսի 13-ին:


Աղբյուր` Փաստինֆո